KNI kannguttaatsuliortoqarsimaneranik unnerluutigineqartunik misissuisoq

Sermitsiaq.AG-mit paasineqarsimavoq, pisortaanerup Peter Grønvold Samuelsenip kannguttaatsuliortarsimasutut unnerluutigineqarnera ima ilungersunartigisimasoq, allaat KNI-mi siulersuisut kukkunersiuisarfimmut PwC-mut suliamik misissueqqusisimallutik.

Kukkunersiuisarfik PwC taamaalilluni marlunnik misissugaqalersimavoq, misissuinerit pisortaanerusimasumut, ataasinngormat atorfimminit tunuarniarluni aalajangersimasumut kingunerluuteqarsinnaapput.

Naatsorsuutinik peqquserluuteqarsimaneraaneq

Kukkunersiuisarfik PwC kinguaassiuutitigut kannguttaatsuliorsimasutut unnerluussutinik misissuinermi saniatigut ingerlatseqatigiiffik uninngasuutimi nalinginik peqquserluttuliorsimanersoq arlaannaannulluunniit attuumassuteqanngitsutut misissuivoq. Suliaq aamma politiinut unnerluutigineqarsimallunilu suli misissorneqartoq.

Aamma atuaruk naatsorsuutinik peqquserluuteqarsimaneq pillugu suliaq: Sermitsiaq.AG-p saqqummiussimasaa

Arnat ilaat Peter Grønvold Samuelsenimik kannguttaatsuliorsimasutut politiinut unnerluutiginnissimasoq politiinit ilisimatinneqarsimavoq, pisortaaneq killisiorneqarsimasoq.

Kalaallit Nunaanni Politiit Peter Grønvold Samuelsen unnerluutigineqarsimanersoq oqaatigerusunngilaat, tamatumunnga pissutaatinneqarluni ”tunngaviusumik pissutaasut aallaavigalugit suliami inuit kikkuunerinik oqaaseqarsinnaannginneq”, poltiit Sermitsiaq.AG-mut politiit suliassamik tigusaqarsimanerannik uppernarsaammik tigummiaqartumut nassuiaapput, suliassaq tigusimasaat suliassat allattorsimaffianni qulequtserneqarsimasoq: kannguttaatsuliorneq.

Misissuinerit suli naammassinngitsut

Siulersuisuni siulittaasup Lars Borris Pedersenip kannguttaatsuliortoqarsimaneranik unnerluutiginninneq tunngavigalugu Peter Grnvold Samuelsen ataasinngormat soraarniuteqarsimanersoq oqaaseqarfigerusunngilaa.

Sermitsiaq.AG-p paasissutissat pissarsiarisimasai naapertorlugit naatsorsuutinik peqquserluuteqartoqarsimaneq kannguttaatsuliorsimanerlu pillugit suliat suli naammassineqarsimanngillat.