KNI aamma Brugseni sinneqartuullaqqinnerit akornanniittut

Jyllands-Postenip inuussutissarsiorneq pillugu tapiliussaani, inuussutissarsiorneq pillugu database BIG peqatigalugu ulluinnarni atortussanik niuertarfiit annersaasut 25-t naatsorsuutaat kingulliit misissorsimavaat.

Uuttuutit pingasut
Uuttuutaasuni assigiinngitsuni pingasuni kalaallit niuertarfii KNI aamma Brugseni takuneqarsinnaapput.

Kaaviaartitat uuttorneqarnerini KNI arfineq-aappaattut inissisimavoq, Kalaallit Nunaanni Brugseni qulingattut inissisimalluni, taakku kaaviaartitaraat 2.367.372.000 koruunit aamma 744.476.000 koruunit. Allattorsimaffimmi siullertut inissisimasumut ungasippoq, tassaniippoq Dansk Supermarked Group, niuertarfiit aqqutsigalugit 57 milliarder koruuninik kaaviaartitaqarpoq, ilaatigut Netto, Bilka aamma Føtex tassaniipput.

Misissueqqissaarnerup aamma sorliit siuariarnerusimanersut misissuiffigaat, tassanilu Kalaallit Nunaanni Brugseni kusanartumik tallimaattut inissippoq, 3,5 procentimik siuariarami, taamaallaat ukunannga anguneqarluni Aarstiderne, Rema 1000 Danmark, Jaco Supermarkeder aamma Kort & Godt.

Sinneqartoortitsisinnaassuseq
Niuerfimmi sinneqartooruteqartitsisinnaanermi aamma misissueqqissaarnermi saqqummiunneqarpoq, tassanilu aamma Brugseni KNI-lu Kalaallit Nunaanni niuertarfinnik ingerlatsilluarsinnaassuseqartut iluanaaruteqarlutillu.

Kalaallit Nunaanni Brugseni siorna 8,6 procentimik iluanaaruteqarpoq, tamannalu danskit niuertarfeqarfiini anginerni 25-iusuni arfernattut inissippoq. KNI qulingiluaattut inissippoq 6,4 procentimik iluanaaruteqarluni.

Iluanaaruteqarneq qanoq naatsorsorneqarpa
Iluanaaruteqarnermut naatsorsuineq pingaarnertut ingerlatsinermit (Ebit) pigisat nalillit agguaqatigiisinnerinik agguarlugu, suliffeqarfimmullu aningaasat qanoq amerlatigisut attuumassuteqarneranut sanilliullugu suliffeqarfiup sinneqartoortitsisinnaaneranik takutitrsilluni.