- Tasiilami Ittoqqortoormiinilu immikkoortortaqarfinniit oqaluttuarfigitippugut 2017-imi kisitsinerit ingerlanneqarmata misissuisut piniartunik suleqateqarsimanngitsut, kisitsinerit julimi ingerlanneqartut qilalukkat qernertat sumiiffimmiit qimagussimanerisa nalaanni.

Biologit qilalukkanut qernertanut tunngatillugit immikkut ilisimasaqartut, Tunumi qilalukkat pillugit mianersoqqusereersut KNAPK tusagassiutinut nalunaarummik allappoq.

Naalakkersuisoqarfiup 2020-mi qilalugartassiissutissat pillugit tusarniaassutigisaani takuneqarsinnaavoq, Ittoqqortoormiit 40-nik pisassinneqassasut, Tasiilaq qulinik pisassinneqassasoq Kangerlussuarluni pisassinneqassanngitsoq.

- Ulluni makkunani Aalisarnermut Piniarnermut Nunalerinermullu Naalakkersuisoqarfimmiit (APNN-miit) tusarniutigineqarpoq 2020-mi nunatta kitaani kangianilu qilalugartassat, tupaallannaqisumik nunatta kangiani qilalugartassat qernertat 2020-miit ikilisikkiartuaarniarneqarput, allaat Tasiilap eqqaani 2022-miit piniaqqusaajunnaarnissaat innersuussutigineqarsimalluni, tamanna pivoq Atlantikup Avannaani Imaani Miluumasut pillugit Ataatsimiititaliaq (NAMMCO) suli innersuussutinik saqqummiinngitsoq NAMMCO-miit nalunaarut suli saqqumminngitsoq, naak Pinngortitaleriffimmiit oqariartuutigineqartartoq innersuussutit nunat tamat akornanni suleqatigiiffinniit akuerineqaqqaarlutik naalakkersuisunut tunniunneqartartut, KNAPK nalunaarpoq.

KNAPK arlalinniit uparuartorneqartarpoq piniartunik sullissinngippallaarnerarlugu.

- Ukiut tamaasa ukiup tullissaanut qilalugartassat tusarniutigineqartarput, tamatigullu KNAPK-miit immikkoortortaqarfiit peqatigalugit oqariartuutit qulaatiinnarlugit aaliangiisoqartarpoq, taamaalilluni KNAPK-mi inatsisit malillugit tusarniaaneq atorlugu oqariartuutit apuuttarpai taakkuli kinguneqarneq ajorput, ilaasortallu arlallit apeqqusertalerpaat ilumut tusarniaaneq atorneqartarnersoq imaluunniit tusaniaasuusaarnerunersoq.