KNAPK: Piniartut isumaat tusaaneqassapput
Piniartut siunnersueqataasalertariaqarput. Tamanna KNAPK-p isumasiortitsinerani oqariartuutigineqarpoq, tassani Naalakkersuisunut innersuussisoqarluni
Piniartut ilisimasaat atorneqarnerusariaqarput.
Tamanna KNAPK-p isumasioqatigiisitsinerani oqariartuutigineqarpoq. Isumasioqatigiisitsineq marlunngormat pingasunngormallu ingerlanneqarpoq, tassanilu Naalakkersuisunut innersuussutit ingerlateqqinneqarput.
Piniartut innersuussinerni akuutinneqarnerunissaat ilaatigut neriuutigineqarpoq.
- Piniakkat pillugit aqutsinermi piniartut pinngortitamillu atuisut ilisimasaat, nalunaarsuinikkut suliarineqarlutik, innersuussinermi aqutsinermilu atorneqalernissaat, sumiiffimmut naleqquttumik, inatsisiliornikkut siuarsarneqartariaqarpoq, apeqqutaatinnagu najugaqarfimmiunersoq, nuna tamakkerlugu nunalluunniit allat peqatigalugit innersuussisoqarnersoq, Naalakkersuisunut ilaatigut innersuussutigineqarpoq.
Piniakkanik pinngortitamillu sumiiffinni ataasiakkaani atuisut nalunaarsuinerat tapersersorneqartariaqartoq aamma innersuussutigineqarpoq.
- Pisuna tamatumaluunniit assinganik sinerissami inoqarfinni amerlanerusuni ingerlatsisoqalernissaa Naalakkersuisunit inatsisiliornikkut tapersersorneqartariaqarpoq, KNAPK innersuussivoq.
Pisunap Attumi immikkoortortaqarfia Nordisk Rådip avatangiisinut nersornaasiuttagaanik nersornaasigaaqqammerpoq.
Pingajuattut innersuunneqarpoq atuarfinni najugaqarfigisami pinngortitami pissutsit pillugit atuartitsineq, sumiiffigisami pinngortitamik ilisimasallit suleqatigalugit annertusarneqartariaqartoq aamma innersuunneqarpoq.