Skip to main content

KNAPK: Isumaqatigiinngikkaluarluta suleqatigiippugut

Kattuffiup isumaqatigiinngittoqaraluartoq kikkut tamarmik suleqatigalugit, KNAPK-mi siulittaasoq Nikkulaat Jeremiassen siulersuisuunerillu naqissusiipput.

Aalisartut piniartullu kattuffiata KNAPK-p siulersuisuuneri Nikkulaat Jeremiassen siulittaasoralugu siulittaasuusimasup Henrik Sandgreenip isornartorsiuinera maanna akissuteqarfigaat, taassuma aqutsisunngortut iluamik ingerlatitseqqinnissamut suleqatigiittoqannginnera isornartorsiorpaa.

Kattuffiup ilaasortarpassuaqarnermini isumaqatigiittoqartuaannanngikkaluartoq suleqatigiinneq pingaartittuaannaraa, KNAPK-p siulittaasortaavata Nikkulaat Jeremiassenip Sermitsiaq.AG-mut allagaqarluni akissuteqaammini oqaatigaa.

- Kattuffiullu nakooqutigiuaannarsimasaa tassaavoq assigiinngiiaassuseq, aamma isumaqatigiittuaannanngikkaluarluni suleqatigiissinnaaneq, Nikkulaat Jeremiassen taama oqarpoq, taanna Henrik Sandgreenip isornartorsiuineranut toqqaannartumik qisuariaateqanngilaq.

Uppisitsinermik pasillernerit
Oktobarip pingajuanni ileqquusumik ataatsimeersuartoqarnerani Henrik Sandgreen tunuartinneqarpoq, Nikkulaat Jeremiassen siulittaasunngortoq. Ataatsimeeresuarnermi tassani siulersuisuunernut ilaasortanit qulingiluaasunit tallimat taarserneqarput.

LÆS OGSÅ: Henrik Sandgreen: Pisut meerarpaluppallaarput

Tassani siulersuisuunerit nutaat qinerneqarnerat ilaasortanit ataasiakkaanit Henrik Sandgreenimik uppisitsinertut oqaatigineqarpoq:

- Kattuffiup malittarisassai malillugit ataatsimeersuarneq ingerlanneqartup inernera, siuttutullu qinigaasut tamanit isumaqatigineqanngillat, tamannaavormi tamat oqartussaaqataanerisa atugassarititai, siulersuisuuninngortut qulingiluaasunit nutaatut isertut katillugit tallimaapput, tassa nutarterinissaq amerlanerusunit pisariaqartissimavaat, siulittaasunngortoq taama akissuteqarpoq.

Malittarisassat allanngortinniaraat
Aalisartut piniartullu kattuffiata ”aaqqiagiinnginnerit ikummarissarnissaat” ukkatariniarnagu, KNAPK-mi siulersuisuunerit naqissuserpaa, kattuffik annertuunik nukinnik pisariaqartitsisumik suliassaqarmat. Ilaasortat amerlanerpaat aalisarnermut inatsit nutaaq piginneqataaffigisutut misigissagaat, kattuffiup pingaartikkaa oqaatigineqarpoq. Tassani ilaasortat siammasissumik oqallinnissamut qaaqquneqassapput peqqissaartumillu paasitinneqassallutik.

- Ilaasortat assigiinngitsunik soqutigisaqartut sullinnerini tamatigut tamarmik iluarisaannik naammassisaqarfiusinnaasanngilaq, taamatullu siuttunngortut tamanit isumaqatigiuaannarneqartanngillat.

Kattuffiup maanna malittarisassat allanngorneqarnissaat sulissutiginiarpaa, taamaalillutik ilaasortat assigiinngisitaartut siunissami inissaqassammata, taamaalilluni aalisartunut piniartunullu atukkat pitsaanerpaat anguneqassallutik.

LÆS OGSÅ: IAPP sinnerlugu aallartitat: – Nipangertinniarluta sioorasaaraluarpaatigut
OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER