KNAPK: Arfattassat tigulluarneqarput, kisianni...
Tunumi tikaagullittassiissutit arfineq-pingasunik amerlineqarsinnaanerat iluatsimmat KNAPK-p nuannaarutigaa, taamaalilluni katillugu 20-nik pisaqartoqarsinnaalluni. Kisianni kattuffiup aamma unammilligassat taakkartorpai.
Sapaatip-akunnerata siuliani Nunarsuaq tamakkerlugu Arfanniarneq pillugu Ataatsimiititaliarsuup Brasiliami ataatsimiinnermini Kalaallit Nunaanni arfattassat ataaseq kisiat pinnagu attatiinnarneqarnissaat isumaqatigiissutigaat, tassani Tununi tikaagullittassat 12-nit 20-nut amerlineqarput.
Amerlasuut neqinik pilersorneqartut
- Minnerunngitsumik tikaagulliit tapertaalluarput inuppassuarnullu neqinik pilersuisuullutik, piffinni tamani umiatsiaararsortut qoorortoorsorlutik tikaagullinniarsinnaanerat pingaartinneqarpoq, KNAPK-mi siulittaasoq Henrik Sandgreen, tusagassiuutinut nalunaarummi allappoq.
Kisianni tikaagulliusaartassat qipoqqartassat arfivittassallu ukiuni kingullerni tamakkerneqarneq ajortut, taassuma ilisimatitsissutigaa.
Pilersaarusiorneq pisariaqartoq
- Maanna ukiuni tullerni arfernik atorluaanissamik pilersaarusiornissaq tullinnguuppoq, Henrik Sandgreen allappoq.
Pilaffiit naleqquttut neqillu atuisunut aqqutissaat pitsaasut inerisartariaqartut, taassuma oqaatigaa.
- Naggataagut arfernik takornariartitsineq arfanniarnerlu sanileriissinnaanersut sanileriissappatalu qanoq tamanut naammaginartumik aaqqiisoqarnissaata oqallisiginissaanut piareersimavugut, KNAPK-mi siulittaasoq ilisimatitsivoq.