Skip to main content

KNAPK: Aalisartut sussuseqanngitsut pinerluttunngortinneqartarnerat unitsilli

Aalisartut seks meterit sinnerlugit umiatsiaaraqartut 1. juli sioqqullugu angallatiminnik inuussutissarsiornertik pillugu nalunaaruteqartussaatitaapput, taamaakkaluartoq aalisartut 217-it pisussaaffitsik naammassisimanngilaat. Tamatuma malitsigisaanik KANUAANA-p nalunaartussaatitaaneq 26. julip tungaanut sivitsorpaa, taamaakkaluartorli aalisartut 129-it suli nalunaarsuisimanngillat, taamaammat taakku politiinut nalunaaarutigineqarlutillu akiligassamik tunineqartussanngorput

Inuussutissarsiutigalugu aalisartut aalisarnermillu ingerlatsisut angallatip tamakkiisumik takissusaani 6 meteri sinnerlugu angissusilinnik angallatillit tamarmik nunamilu aalisakkanik tunisassiorfiit tamarmik qaammatisiutit malillugit ukiup siuliani aningaasaqarnermi paasissutissanik arlalinnik Kalaallit Nunaanni Aalisarsinnaanermik Akuersissutinik Nakkutilliivimmut (KANUAANA) ukiut tamaasa nalunaaruteqartassapput.

Sermitsiaq allappoq.

Aalisartut sussuseqanngitsut pinerluttunngortinneqartut 

Taamaattorli aalisartut piniartullu kattuffiannit, KNAPK-mit aaqqissuussineq 2014-mi atulersinneqarnikuusoq paasiuminaatsinneqarpoq. Kattuffiup siulittaasua, Henrik Sandgreen erseqqissaavoq aalisartut innuttaasutulli allatut pisussaaffeqartut akileraartarnermut qullersaqarfimmut isertitatik pillugit nalunaaruteqarnissaminnut. Taassuma paasisinnaanngilaa sooq KANUAANA akileraartarnermut qullersaqarfimmut aalisartut ataasiakkaat pillugit paasissutissanik pissarsiniaannartannginnersoq:

– Aalisartorpassuit pisariaqanngitsumik allaffissornerujussuarmik eqqornerlugaasarput. Tamanna Namminersorlutik Oqartussat politikerillu iliuuseqarfigisariaqalerpaat. Tassami aalisartut tamarluinnarmik 1. maj tikitsinnagu nammineerluni nalunaarsuisussaatitaapput, tassani aamma takuneqarsinnaasussaapput aalisartut ataasiakkaat ukiumi aningaasarsiorfiusup siuliani aningaasatigut qanoq inissisimasimanersut, Henrik Sandgreen Sermitsiamut oqarpoq.

Eqqarsarnarpoq ajuusaarnarlunilu

Aalisartut piniartullu siulittaasuata kaammattuutigaa eqqumaffigineqartariaqartoq qanoq annertutigisumik aaqqissuussaaneq pissutaalluni aalisartut allaffissornikkut isumagisassaannik piumaffigineqarsinnaanersut, aammalu inuussutissarsiutigalugu aalisarnermi aammalu nunami tunisassiorneq pillugu tunisassiornikkut aningaasaqarnikkullu paasissutissanik nalunaarutiginnittarneq pillugu Namminersorlutik Oqartussat nalunaarutaat nr. 11, 1. august 2017-imeersoq nalilersoqqinneqassasoq sakkortuumik kaammattuilluni:

– Aaqqissuussaaneq taamatut itsillugu aalisartut sussuseqanngitsut pinerluttunngortinneqartarput, tassami taakku pisussaaffitsik naapertorlugu akileraartarnermut qullersaqarfimmut nalunaarsuisareerput. Aamma eqqaamaneqartariaqarpoq ullutsinni aalisartorpassuit suli silarsuarmut digitaliusumut ikaarsaarnikuunngimmata. Taamaakkaluartoq allagarsisinneqaratilluunniit sioorasaarinertalimmik nukingisaarneqartarput. Pisussaaffilersorneqarput kukkunersiuisussarsiussallutik nalunaarsuutigeqqusaasunut ikiortissaminnik, taassumalu qaavatigut aamma ukioq manna covid-19 aningaasarliortitsereeqisoq akiligassanik siorasaarneqarput. Assut eqqarsarnarpoq ajuusaarnarlunilu nunarput aalisartortaminut pisarissersuilluni pullasersuimmat. Tamanna unitsinneqartariaqarpoq, Henrik Sandgreen kissaammeqqalluni Sermitsiamut oqarpoq.

Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq:

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER