KNAPK: Aalisarneq aallartissinnaanngorpoq
Nipisat kiilumut akii pillugit isumaqatigiittoqareermat, nipisat suaannik tunisisinnaanerup ingerlaannartumik ammarneqarnissaa pillugu KNAPK Naalakkersuisunut piumasaqassalluni suliaqarpoq, aalisartut erngerlutik aningaasarsiulersinnaaniassammata.
- Aalisartut ullumimiit aalisarsinnaalissapput suannillu tunisisinnaalertariaqarlutik. Aqutsivinni maanna arnarlunniarfiusinnaasuni, tassa Maniitsumiit kujammut, tamanna atuutissaaq.
KNAPK-p siulittaasua, Nikkulaat Jeremiassen Sermitsiaq.AG-mut oqarpoq.
KNAPK aamma Royal Greenland nipisat suaat kiilumut akianik ullumi isumaqatigiissuteqarput. Nunatsinni aalisartut piniartullu kattuffianni siulittaasup uppernarsarpaa aalisarnermut piniarnermullu naalakkersuisoqarfimmut arnarlunnik aalisartoqalernissaa, nalunaarut malillugu immikkut ittumik ullumimiit aallartittussatut, qinnutigineqarnissaa kattuffiup sulissutigigaa.
- Isumaqarpugut akip 4 koruunimik qaffanneqarnera ajunngilluinnartoq, tassami piumasarisatta 80 procentia anguarput. Akuersinitsinnut pissutaanerpaavoq aalisartut piaartumik aalisarsinnaalernissaat uagutsinnut pingaaruteqarmat, Nikkulaat Jeremiassen oqarpoq.
Aalisarnermut naalakkersuisoqarfimmi pisortap, Jørgen Isak Olsenip Sermitsiaq.AG-mut uppernarsarpaa KNAPK-mit qinnuteqaat utaqqineqartoq.
Piumasaqaatit qaqinneqarput
Nipisat suaat kiilumut 26 koruuneqartinneqarlutik, aalisartunullu tunisinermi bonusi 1 koruuniutinneqarluni isumaqatigiissut KNAPK akuersinnginnermini piumasaqaatinik aamma qaqitaqarpoq.
- Isumaqatigiissutissatut angusaq akuersissutigineqarpoq, taamaattoq Royal Greenland A/S-imut piumasarineqassaaq aalisakkat allat pillugit oqaloqatigiinnerit ullut 14-it ingerlanerani aallartissasut, Nikkulaat Jeremiassen oqarpoq akitigullu isumaqatiginninniarnerup ingerlanerani KNAPK-p immikkoortortaqarfiisa suliniuteqaqataasimanerannut qujassuteqarluni.
KNAPK-p ilanngullugu piumasaraa nipisannut tunngatillugu TAC tamakkerlugu aalisarneqassasoq, akillu aalisarnerup nalaani allanngortinneqassanngitsut.
Isornartorsiuineq suli atuutsinneqarpoq
Royal Greenlandip nipisat suaat kiilumut 22 koruunimik akeqartissallugit isumaqatiginninniarneq aallartikkaluarpaa, KNAPK-lli kiilumut aki 5 koruunimik ilatikkumasimallugu.
Royal Greenlandip KNAPK-llu aaqqiagiinnginnerisa nalaani KNAPK Naalakkersuisunut allagaqaraluarpoq akip nikigassutaa Namminersorlutik Oqartussanit matussuserneqarnissaa siunnersuutigalugu.
Tamannali anguneqanngitsoq, Royal Greenland akitigut isumaqatigiiissusiorniarnermi KNAPK-mut qanillattorpoq.
- Illuatungeriit isumaqatigiikkaluartut Naalakkersuisunut isornartorsiuinerput suli atortipparput. Maannakkorpiaq suannut akit pineqarput. Kisiannili eqqaamaneqassaaq aamma isornartorsiuisimagatta avannaani aalisartut piniartullu silap immallu kissatsikkiartorneranit eqqugaasut, aamma tunumi uuliarluertoqarnerani eqqugaasut ikiorserneqannginnerat pillugu, KNAPK-mi siulittaasoq erseqqissaavoq.
Nipisanniarnissamut ullugititat avannaani aqutsivinni nikinngillat.
