KNAPK: ´Upernavik Seafood ajorluinnarpoq´

Siusinnerusukkut unammillernerup nalaani Polar Seafood A/S aamma Royal Greenland A/S annertuumik piorsaapput, taamanilu sulisussaaleqisoqanngilaq. Kattunnerulli kingorna qale-rallit qeritiinnarlugit avammut tunisassiarineqalerput kisermaassinerup aqqani. Maanna ukiorpassuanngortuni aalisartunik mitalliilluni soqqusaaqisumillu naalagarsuartut pissusiler-sorneq unittariaqalerpoq aalisartut suusupagisaanerat tamaanga killeqartariaqarpoq!
Taamatut tusagassiorfitsigut nalunaarutikkut allappoq KNAPK-p siulittaasorigallagaa Leif Fontaine. Toqqaannartumik allappoq Upernavik Seafood soqqusaappallaarujussuartoq.
– 19. maj 2104 KNAPK tusagassiutinut nalunaaruteqarpoq Upernavimmi aalisartut Upernavik Seafood-ip pitsaassutsimik qaffassaaqataanissaanik ujartuillutik. Sineriaap sinneranisuulli;
pisat tunisassiorfimmut assartornerini karsinut (fiskekasser) ikillugit assartorneqar-tassasut, karsillu asareernikut Upernavik Seafood-p aalisartumut aallannginnerani tunniuttassagai, aamma
kiatsinnerani Upernavik Seafood sikunik nillusaatissanik aalisartunut agguaasassasoq.
Aalisartut piumasaqarnerat akillugu Upernavik Seafood-p pisortaata Flemming Andersenip akissutaa (Sermitsiaq 23. maj 2014) tassatuaavoq: ”Suliffissuarmi eqqiluisaartoqarpoq, nunaqarfinniuna eqqiluisaartoqanngitsoq.” Tamanna tupigusuutigaarput, Leif Fontaine oqarpoq.
– Tupigusuutigaarput inuiaqatigiit suliffeqarfiutaata Royal Greenland A/S-p Upernavik Seafood-imi 50%-mik piginneqataasup pissutsit akueriinnarsinnaammagit. Aalisakkammi nioqqutissiassat plastikkersuarnut uliinnarlugit angallanneqarsinnaanngillat, nunatta avataani pisisartut tamanna nalunngikkaluarnerpaat? Piginnittummi sinniisaat Naalakkersuisut sumiippat?, Leif Fontaine aperivoq.
Ilanngullugu tupigusuutigaa Upernavik Safoodip pisortaa Upernavimmi qaleralinniarneq pillugu isumasioqatigiinnermi peqataanngimmat:
– Nalunngisatsituut qanittumi Majip naanerani (30. maj – 1. juni) Upernavimmi qaleralinniarneq pillugu isumasioqatigiittoqarpoq. KNAPK-mit siusinnerusukkut, suliffeqarfiup pingaarute-qaqisup pisortaata Flemming Andersen-ip peqataannginera avoqqaarinnissutigereerparput. Avoqqaarinninnerput attapparput.
– Suliffeqarfiup maannamut kisermaassilluni qaleralinnik sineriarujussuarmi (400 km) pisiortortutuaasup pisortaa, KNAPK isumaa malillugu, soorngunami isumasioqatigiinnermi peqa-taasariaqarpoq, pingaartumik illoqarfimmeereeruni. Suliffeqarfiup allaffianiit isumasioqatigiiffimmut 500 meter missaannaani ungasissuseqarpoq, taamaattumik ilumoorsinnaanngilaq peqataasinnaannginneq. Killormut tamassuma takutippaa suliamut sullissanullu soqutigittaannerujussuaq. Qaasuitsup Kommuneani Borgmesteri Ole Dorph-ip ilaatigut aalisartunik suleqateqarnerup pitsaannginneranik oqaaseqarnera, matumuuna kattuffimmiit tapersissavarput.
– Kattuffimmiit Upernavik Seafood ukiormanna marloriarlugu – tusagassiutit allallu ilanngutinngikkaluarlugit – aalisartut kissaataannik apuussivigaarput, ajoraluartumik ullumannamut akineqanngitsunik, naak ujartuineq ataasiarani pisaraluartoq. Taamaattumik kattuffimmiit Upernavik Seafood piumasaqar-figissavarput pitsaassutsip qaffassarusunnerani suleqatigeqqulluta, aammalu aalisartunut tusarnaarsinnaaneq qaffassaqqullugu, Leif Fontaine oqarpoq.