KNAPK suliumajunnaartoqarnissaanik aarlerisaarisoq
KNAPK-mi siulittaasutp Henrik Sandgreenip piumasaraa, aalisartut suliumajunnaassanngippata Naalakkersuisut sineriammut qanittumi aalisartunut ikiorsiissuteqassasut.
Sineriammut qanittumi aalisartunut, ilaatigut saarullinnut akigititat appariartornerannit artukkerneqarsimasunut ikiorsiissutit ukiortaami atorunnaarput.
KNAPK-mi siulittaasumit ernummatigineqarpoq, sineriammut qanittumi saarullinniarnermut, raajarniarnermut assangiarsunniarnermullu ikiorsiissuteqarnissamik nutaamik aallartitsisoqarsimannginnera.
- Naaperiarumaneqanngikkutta uanga ataasiinnaavimmik kaammattuutissaqarpunga. Ikiorumaneqanngikkussi aammalu naleqanngitsutut isigineqaannarussi taava periarfissaq ataasiinnaavoq tassalu: Umiarsualivimmi talinngaannarutta taava aningaasarsiorneq tamarmi univippat aatsaat ikiorserniarneqalissaagut. Tassa taannatuaavoq aqqutissaq, Henrik Sandgreen KNR-mut oqarpoq.
Misissuisoqartoq
Aalisarnermut Naalakkersuisup Jens Immanuelsenip siusinnerusukkut ilisimatitsissutiginikuuaa msissuineq aallartitsisoqarsimasoq.
KNR naapertorlugu aalisartut aningaasaqarnermikkut annertuumik eqqorneqarsimapput, Saarullik niaqoqanngitsoq Royal Greenlandip Nuummi aalisakkeriviutaani kiilumut 11 koruunilerneqartarsimasoq ullumikkut 6,25 koruunilerneqartarpoq.