KNAPK siunnersorteqarfiup atorunnaarnera pillugu: Kusanaatsumik atorunnaarsinneqarpoq
Aalisarnermut piniarnermut kattuffiup siunnersorteqarfiup Konfifap atorunnaarsinneqarnerata ingerlanneqarnera naammaginngilaa, taanna allami ingerlanneqalertussaavoq.
Pisoq aallaqqaataaniilli eqqarsaatigilluagaanngilaq.
KNAPK Aalisarnermut Piniarnermullu Naalakkersuisoqarfimmut Konfifa pillugu ingerlatsineranut atatillugu isornartorsiuisoq taama oqariartuuteqarpoq. Siunnersorteqarfik manna tikillugu aningaasanut inatsimmit 2,2 millionit koruuninik aningaasaliiffigineqarluni KNAPK ingerlataraa.
Taanna ingerlatariunnaartussaavaa.
KNAPK-p aamma Aalisarnermut Piniarnermut Naalakkersuisoqarfiup siunnersorteqarfiup KNAPK-mit ingerlanneqarunnaarnissaa pillugu assigiinngilluinnartunik isumaqarnerat pillugu Sermitsiaq.AG septembarimi ilanngutassiaraa.
Aalisartunut atoruminarninngussasoq
Kattuffiup naalakkersuisoqarfik sipaarniarneraraa: - Sipaarniarneq allatut isigineqarsinnaanngilaq sinerissap qanittuani aalisarnermik nungutitsiniaanertut allaat oqaatigineqartariaqarluni, KNAPK taama oqariartuuteqarpoq.
Taamatulli oqariartuuteqarneq Aalisarnermut Piniarnermut Naalakkersuisoqarfimmit akerlilerneqarpoq: - Siunnersuisoqarfiup sipaarniarfigineqarniarneranik oqariartuut eqqunngilluinnarpoq, Karl Tobiassenip, piniarnermut aalisarnermullu naalakkersuisup kingorna oqaatigaa.
Naalakkersuisoqarfik aalisarnermut kattuffinnit allanit saaffigineqarsimasoq, naalakkersuisup tamatuma kingorna ilisimatitsissutigaa, taakku isumaqarput aalisartunut piniartunullu tamanut siunnersuisoqarfik kattuffimmi ataatsimi inissisimasariaqanngitsoq, akerlianik allami attuumassuteqannginnerusumiittariaqartoq.
Konfifa qitiusumik allattoqarfimmut utertinneqarnissaa eqqarsaatigineqarsimagaluarpoq, kisianni taanna pilersaarut taamaatinneqarpoq. Taarsiullugu siunnersuisoqarfik allarluinnarmi ingerlanneqassaaq aalisartunut ”tikikkuminarnerusumi”.
Piviusorsiunngitsoq
APN-ip (Aalisarnermut Piniarnermut Naalakkersuisoqarfik, aaqq.) KNAPK-llu akornanni angusaqarnissamut isumaqatigiissut ulloq 29. november 2022-mi APN-imiit 2022- ip naaneraniit atuutilersumik atorunnaarsinneqartoq nalunaarutigineqartoq, KNAPK tusagassiuutinut nalunaarummi ilisimatitsipput.
Siunnersuisoqarfiup torersumik atorunnaarsinneqarnissaa APN-mit pinngitsoortinneqarpoq, aalisarnermut kattuffik isumaqarpoq. Minnerunngitsumik KNAPK – APN-p piumasaqarnera malillugu – siunnersorteqarfiup atorunnaarsinneqarnissaanut arlalinnik suliniutinik aallartitsereersoq, taamaattumillu ukiup naaneranit suleqatigiinneq atorunnaartussatut isigalugu sulisoqarpoq, KNAPK oqariartuuteqarpoq.
Kisianni KNAPK piumasaqanngitsoornavianngilaq. Aalisarnermut kattuffiup aalisartunut piniartunullu siunnersorteqarfimmi sulisut marluk soraarsinneqarnissaannut atatillugu aningaasartuutinut matussusiinissamut naalakkersuisoqarfimmut akiliinissamik piumasaqaateqarniartoq, tusagassiuutinut nalunaarummi atuarneqarsinnaavoq.
- Oqaloqatigiinnissamut periarfissat ajoraluartumik APN-miit atorusunneqarsimanngimmata KNAPK-miit ajuusaarutigaarput Aalisarnermut Piniarnermullu Siunnersorteqarfiup ukiuni 18- ini sullissinerup taamatut kusanaatsumik tassanngaannaq atorunnaarsinneqarsimanera tupigusuutigaarput.
Suleqatigiinnermi pisut immikkut ittumik unamillernartoqartinneqartut KNAPK peqatigalugu Aalisarnermut Piniarnermut Naalakkersuisoqarfiup oqaloqatigiissutigalugit, Sermitsiaq.AG-mut ilisimatitsissutigaa. Naalakkersuisoqarfillu taamaattumik isornartorsiuinermut akissuteqarusunngilaq.