Aalisarneq
KNAPK: Sinerissamut qanittumi aalisartunut atugassarisat pitsaanerusut
KNAPK-p siulittaasua Henrik Sandgreen sinerissamut qanittumi aalisartut atugassarisaat pitsanngorsarniarlugit suliniutissanik arlalinnik siunnersuuteqarpoq
Aalisartut piniartullu kattuffiat KNAPK politikerinut kajumissaaruteqarpoq sinerissamut qanittumi aalisarneq qanoq isilluni assigiinngitsutigut pingasutsigut pitsanngorsarneqarsinnaanersoq. Taakkua saqqummiunneqarput KNAPK-p qanittukkut tusagassiortunik katersortitsilluni siunnersuutaasa qaavisigut, taakkualu Sermitsiaq.AG-mi oqaluttarineqarput.
KNAPK-p sinerissamut qanittumi aalisariutit nutarsarnissaannik oqallinnitoqaq sammitilersinniarpaa. Maanna KNAPK-p siulittaasua oqarpoq aalisariutit nutarsarneqarnissaat pisariaqarluinnartoq.
KNAPK-p inassutigaa aalisartut aalisariutinik aalisariaatsinut assigiinngitsunut aaqqissuussanik peqalissasut, sukkasuumik artinik allanik aalisalersinnaalissallutik, aalisariutillu pissutsit naapertorlugit angissutsimikkut atortulersorneqarnermikkullu naleqqussarneqassallutik.
Angallatit nutaat nerisassanik amerlasuukkaarlugit uninngatitsinissaminnut tulluarsagaassapput, peqqissutsimullu eqqiluisaarnermullu piumasaqaatinik naammassinnissallutik.
Tamatuma saniatigut KNAPK-p kissaatigaa aalisartut saniatigut pisatik tunisinnaassagaat, tamakkua eqqaannarnagit. Siulittaasoq Henrik Sandgreen isumaqarpoq pingaaruteqarpoq pisuussutit atorneqarnissaat, saniatigullu pisat inuit qimmilluunniit nerisassaattut atorneqarnissaat pitsaanerusoq, eqqarneranninngarnit.
Kiisalu KNAPK-p ukiup pisassiiffiusup aallartittarnera allanngortikkusuppaa, oqarlunil pisariaqanngitsoq qaammatisiutit malillugit ukiup malinneqarnissaa. Aalisarneq aalisartullu aningaasaqarniarnerat eqqarsaatigalugu piffissami allami aallartinneq immaqa pitsaanerussaaq, Henrik Sandgreen oqarpoq, siunnersuutigalugulu ukioq pisassiiffik juulip aallaqqaataani aallartittassasoq.
KNAPK-p siunnersuutai tamarmik bilagini - kalaallisut qallunaatullu - allaaserisap talerpia'tungaani takuneqarsinnaapput.
Siunnersuutit tamakkua saniatigt KNAPK-p sinerissamut qanittumi avataanilu raajartassiissutit 50-50-inik avittalerniarpai.
Siunnersuut, oqallinnermi saqqummersimanngitsoq tassaavoq KNAPK-p siunnersuutigimmagu pisassiissutitut isumaqatigiissutit tamarmik ukiut tallimat iluanni atorunnaarsinneqassasut. KNAPK isumaqarpoq tamanna qinersinerup kingorna politikerit suliassaasa siullersarissagaat.