KNAPK qilalukkat qaqortat nassiunneqartarnerisa unitsikkallarneqarnerannut avoqqaarinnippoq
KNAPK aalajangiisuussagaluarpat, ingerlaannartumik qilalukkap qaqortap neqaanik 5 kiilu tikillugu Danmarkimi ilaquttanut ikinngutinullu nassiussisoqarnissaa periarfissaassagaluarpoq.
Naalakkersuisut qilalukkap qaqortap neqaanik Danmarkimut nassiunneqartarnerinik unitsitsigallarnerat maluginiarneqanngitsuunngilaq.
KNAPK-mit aamma maluginiarneqarpoq.
Danmarkimi ilaquttanut ikinngutinullu qilalukkap qaqortap neqaanik 5 kiilu tikillugu nassiussinissamut periarfissaq Naalakkersuisut ingerlaannaq ammaqqinneqartariaqaraat, aalisartut piniartullu kattuffiat ammasumik allakkami allappoq.
Inuit nammineq nerisassaattut nassiunneqartarmata, KNAPK taama tunngavilersuivoq.
Unitsitsigallarneq Tunumi pisassiissuteqartoqarnerata kinguneranik atuutilersinneqarpoq, aammattaaq Kalaallit Nunanni piniakkat piujuartussaajunnaartutut nalilerneqarmata. Tunumi qilalukkat qaqortat Svalbardip eqqaani nungoratarsinnaasunut ilaasinnaanerannik, Naalakkersuisut oqarnerat naapertorlugu tamanna pissuteqarpoq.
Naalakkersuisut kissaataasa akerliat
Aammattaaq Naalakkersuisut namminneq kissaataasa tunngaviusumik akerleraat, tassami innuttaasut nunatsinniittut Danmarkimi ilaquttaminnut, ikinngutiminnut aamma napparsimmavimmiittunut nassiussisinnaanissaat pingaaruteqartinneqarluni salliunneqarmat. Naalakkersuisulli nunani tamalaani inatsisit malillugit nassiussisarnerup unitsinnissaanut pisussaaffeqarnerat ajornartorsiutaavoq.
KNAPK-milli kaammattuutaasumut tamanna allannguinngilaq.
Qilalukkat qaqortat issittumeersut Svalbardimeersuunngitsut, aalisartut piniartullu kattuffiat isumaqarpoq. Svalbardimut aqqusaaginnartarput, Nunatsinneersuullutik, taama oqariartuuteqarput:
- Inuit Kalaallit Nunaanni ukiuni 1000-tilinni qilalukkat qaqortat qernertallu nerisaraat, taman-narpiaq ilanngullugu pillugu Kalallit Nunatsinni innuttaasut neqissaqarniarnitsinnut Svalbard akornusersuutiginiarsarineqassanngilaq.
Pisinnaatitaaffinnik atuutsitsineq
Tassunga atatillugu KNAPK Naalagaaffiit Peqatigiit inuit pisinnaatitaaffiinut innersuussivoq.
- Nunap inuiisa inuussutissarsiornikkut nerisassaqarniarnikkullu atugarisaat pisinnaatitaaffiilu pillugit FN-ip isumaqatigiissutai naapertorlugit ingerlatsinissaq innersuussutigineqassaaq.
Taamaattumik KNAPK-p Naalakkersuisut kaammattorpaat, una ajornartorsiutaasoq piaartumik aaqqiissuteqarfigeqqullugu, inuit Kalaallit nunatsinni najugaqartut nammineq aalajangiisinnaassutsitta iluaniimmat.