KNAPK pisassiissuteqariaatsimut nutaamut tapersiisoq
Aalisartut piniartullu kattuffianit oqaatigineqarpoq, sineriammut qanittumi aalisartunut pisassiissutit tunineqarsinnaanngortinneqarnissaat eqqortuusoq.
Aalisarneq pillugu Ataatsimiititaliarsuup inassuteqaataasa ilaat piviusunngortinneqarsinnaasuuppata, aalisartut kiffaanngissuseqarnerullutik tunisinermi akigititassanik isumaqatiginninniarsinnaalissapput. Aalisartoq nammine pissassiissutinik pigisaqaruni aningaaserivimmit aningaasaliiffigineqarnissamut periarfissagissaarnerussaaq, taamalu aalisakkerivissuarnut pituttorsimavallaarunnaarluni.
Aalisartut piniartullu kattuffianit KNAPK-mit Aalisarneq pillugu Ataatsimiititaliarsuup isumaliutissiissutaanut sapaatip akunnerani kingullermi saqqummiunneqartumut taamatut qisuariarluni oqartoqarpoq.
KNAPK-mi siulittaasoq Henrik Sandgreen ilaatigut allappoq:
- KNAPK-miit ukiuni kingullerni aalisarnikkut aqutsineq arlalitsigut uparuartarparput,
annertunngikkaluamillu angusaqarfigisarlugu, assersuutigiinnarlugu avannaani sinerissap qanittuani qaleralinniarfinni “47-qarfinni” killeqanngitsumik aalisarfiusinnaasunik (titarniliinerit) atuutilersitsisoqarmat, kattuffimmiit akerliusimavugut, titarniliinerillu ukiut arfinillit atuutereerlutik siorna atorunnaarput.
- Taamaammat aqutsinikkut allannguinerit Ataatsimiititaliarsuakkut innersuussutigineqartut
aningaasaliissutitigut pitsanngorsaataassappata KNAPK-miit iluaqutitut isigissavagut.
Pisassiissutit niuerutigineqarsinnaasut qularnaveeqqutigineqarsinnaasut
Henrik Sandgreenip innersuussutigaa, ataasiakkaanut pisassiissutit niuerutigineqarsinnaasut ilaaqigut sineriammut qanittumi umiatsiaararsorlutik qaleralinniartunut assagiarsunniartunullu atuutsinneqalernissaat KNAPK-mit inassutigineqarsimasoq.
- Tamannalu kisermaassineq, isumannaatsumik, pisinnaatitaaffiullu sivisussusaanik nuussisinnaanermillu naammassiffiussaaq, taamaalillunilu aalisartumut qularnaannerpaamik isertitsissutaasinnaassalluni, Henrik Sandgreen allappoq.
Aalisarneq pillugu Ataatsimiititaliarsuup aalisarnermi tamarmi pisassiissutit niuerutigineqarsinnaalernissaat inassutigisimavaa.
KNAPK-mit oqaatigineqarpoq, aalisartup ukiumut pisassiissutinik nammineq pigisaqarnermigut atortunut nutaanut aningaasaliissuteqarsinnaalissasoq, pisassiissutit aningaaserivimmi taarsigassarsinissamut qularnaveeqqutigineqarsinnaammata.
- Aalisarfiit amerlavallaanit atorneqartut
Alisarneq pillugu Ataatsimiititaliarsuup tamatuma saniatigut inassutigaa, sineriammut qanittumi qaleralinniarnissamut saarullinniarnissamullu piffissami aalajangersimasumi akuersissutinik nutaanik tunniussisarnerup unitsinneqarnissaa.
Tassunga atatillugu KNPK aamma isumaqataavoq, aalisartut isertitaat apparsimammata aamma aalisarfiit amerlavallaanit atorneqartarmata:
- Akit qaffasissut anguneqaraangata soorlu, sinerissap qanittuani qaleralinniarnermi
aamma nipisaat suanniarnermi, aalisarnermut soqutiginninneq qaffangaatsiarpoq, akuersissutillu tunniunneqartartut ukiualunni amerleriangaatsiarlutik. Tamatuma kingunerivaa akitigut angusaq pitsaagaluartoq aalisartut ataatsip isertitaa apparmat, tassa aalisarfiit amerlavallaanit atorneqalermata aalisagaqatigiit sunnerneqarlutik ilaatigullu tunitsivinni killilersuisariaqarnerit, Henrik Sandgreen oqarpoq.