Piniartut aalisartullu isertitaqarniarnerat killilerujussuarneqarpoq. 

Taamatut KNAPK-mit nalunaaruteqartoqarpoq, tassani ukiuunerani silap unerisimannginnerujussua kingusissumillu sikuniarnera innersuussutigalugit. 

Ineqarnermut nerisassanullu aningaasartuutaat aamma akilerneqartussaapput, KNAPK-mit piniartut aamma/imaluunniit aalisartut,aningaasartuutinut ingerlaavartunut  akiliuteqarnissaminnut isertitaqarnissaat ajornarluinnarsimasoq oqaatigalugu allapput.

KNAPK-mit taamaammat siunnersuutigineqarpoq, piniartut katillugit 415-iusut nunatta karsianit ukiut tamaasa 5000 koruuninik tunineqartassasut.

KNAPK Siorapalummiit, Qeqertamiit, Savissivimmiit, Qaanaamiit, Kullorsuarmiit, Nuussuarmiit, Kangersuatsiamiit aamma Upernavik Kujallermiit saaffiginnissutinik tigusaqarsimavoqp, taakkulu tamarmik Naalakkersuisut ikiorsiissuteqarnissaannik siunertaqarluni kattuffiup ikiorneqarnissamik saaffiginnissuteqarnissaa piumasarisimavaat.

Immikkut ittumik ikiorsiissuteqassasut

Taakkua saniatigut Ittoqqortoormiini, Isortumi, Tiniteqilaami, Kuummiuni, Kulusummi aamma Tasiilami piniartut aamma ikiorserneqarnissamik saaffiginnissuteqarsimapput. KNAPK-mit ilisimatitsissutigineqarpoq, piniartut Nanortallup aamma Narsap eqqaamiuiniittut isertitaqarniarnikkut aamma annertuumik eqqugaaqqasut.

KNAPK-miut tamanna tunngavigalugu kissaatigineqarpoq, nunap ilaani piniartut aalisartullu immikkut ittumik ikiorserneqarnissaat ukunani pissasoq: Qaanaaq, Upernavik, Ittoqqortoormiit, Tasiilaq, Nanortalik aamma Narsaq.

Aalisartut Piniartullu Kattuffiat pisariaqartitsinerup qulaajaaffigineqarnissaa pillugu Aalisarnermut Piniarnermullu Pisortaqarfimmik oqaloqatiginninnissamut piareersimanerarpoq. KNAPK-mit oqaatigineqarpoq, piniartut aalisartullu taamatut nalaataqartut ikiorserneqarnissaannut inatsiseqanngitsoq.

KNAPK-mit missingersorneqarsimavoq aningaasaliissutissat katillugit 2,075 millioner koruuninik annertussuseqassasut, taakkulu nunap immikkoortuini piniartunut 415-it missaanniittunut ikiorsiissutaassasut.