Skip to main content

KNAPK: Piffissaq takkuppoq - inerteqquteqarunnaarli

KNAPK-mi siulittaasuugallartoq Leif Fontaine nunatsinni puisinniartarneq pillugu oqalugiaateqarpoq

- Tusaaneqarnissarput neriuutigaarput. Inuiaqatigiit amerlavallaanngikkaluarpugut, ungasittumilu najugaqarluta. 

KNAPK-mi siulittaasup tullia siulittaasuugallartorlu Leif Fontaine, puisinniartarneq pillugu oqalugiarnermini aallartippoq. 

Nunatsinni puisinniartarneq pillugu Christiansborgimi ullumi sisamanngornermi tusarniaassutigineqartumi oqalugiartunut ilaavoq. Tamanna Kalaallit Nunaanni ataatsimiititaliap aaqqissuussaraa. 

- Kalaallit Nunaata avammut tunisaqartarnera eqqorneqarujussuarpoq EU-mi puisit eqquteqqusaajunnaarmatali. EU-mit puisinniartarneq ileqqorissaanngitsutut nalilerneqarpoq, aamma amerlavallaanngillat ilisimannittut naggueqatigiit inuit uani eqqorneqarniannginnerat. Naak naggueqatigiit inuit inatsimmi eqqorneqarnianngikkaluartut puisit amiinik avammut tunisaqartarneq suli inatsit atulinnginneranit avammut tunisartakkat 10 procentiinnanngornikuupput. Leif Fontaine oqarpoq.

- 10 procenti eqqarsaatigilaariarsiuk. Danskit puulukinik avammut tunisaqartarnerat 90 procentimik apparsimasuuppata ukiuni arlaqanngitsuni, tamanna 30 milliardit missaannik naleqassaaq. 

KNAPK: Kinaassusersiorneruvoq
Leif Fontainep oqalugiarnera minutsini 15-ini missaanni sivisussuseqartumi ilaatigut aamma oqarpoq. 

- EU-mut puisit amiinik eqquseqqusiunnaartoqarnera isumaqatiginngisaannarnikuuarput. Taamatut aalajangerneq kinaassusersiorneruvoq ajoqutaallunilu. Puisinniartarnerup ileqqorissaanngitsutut nalilerneqarpoq, naak naggueqatigiit inuit eqqorneqannginnissaat anguniarneqaraluartoq, inuiaqatigiinnut eqquinerluppoq. Eqqarsaatigilaariarsiuk siulisi ukiorpassuarni aallussimasaat narrunartutut naakkittaatsutullu isigineqalersimappata. EU-mut puisit amiinik eqquseqqusiunnaarnera taamatut misigilersippaatigut, Leif Fontaine oqarpoq. 

KNAPK-mi siulittaasup tulliata Christiansborgimi naggataarutaasumik ima oqaaseqarpoq:

- Tusarnaarnissinnut qujarusuppunga, neriuutigaara Danmarkimi naalakkersuinikkut ingerlataqartut nunatsinni piniartut piumasaat tusaassagaat, tassa paasissutissiisoqartariaqartoq, taartisiaqartitsisoqartariaqartoq naggataagullu EU-mut puisip amiinik eqqussisoqarsinnaaleqqinnissaa sulissutigineqarnissaa neriuutigineqarluni. Danmark Kalaallit Nunaallu qanimut suleqatigiittariaqarput. Naapertuulluarnermik angusaqartoqartariaqarpoq. Isumalluutit amerlasuut nammineq pigisat atorluarneqarnissaat nungukkiartuutaanngitsumillu piniarsinnaanerit nunarsuarmi maani sumiluunniit najugaqaraluaraanni atorluarneqartariaqarput. 

Leif Fontainep oqalugiaataa talerpiata tungaani atuarneqarsinnaavoq (Qallunaatuinnaq allaqqavoq)

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER