KNAPK: Nunap aalisartui illersorsigit

Nunatsinni aalisartut piniartullu kattuffiat isumaqarpoq sinerissap qanittuani aalisartorpiaat illersugaannginneri ukiuni kingullerni toqqaannartumik malunnarsiartuinnavissimasoq.

Taamaammat kattuffik isumaqarpoq Inatsisartut aalisarnermut inatsimmik nutarteriniarnerminni nunatsinni aalisartut illersorusariaqaraat.

- Tassami taamaasiunngikkutta aalisartoqarnikkut, aalisariuteqarnikkut, tunitsiveqarnikkut, kiisalu pingaarnertut tunisassiorfeqarnitsigut ‘pisuussutitta inuiaat sinnerlugit atortinneqarneri’ inunnut ikittuararsuarnut tamakkiisumik agguaanneqalersimassammata.

- Tamanna malunnarnerpaajusimavoq sinerissap qanittuani raajarniartuunerup nunatsinni inuusunik najugaqavissunillu pigineqarnerisa nungulluinnalernerinik.

Taama KNAPK-p siulittaasua Henrik Sandgreen ukiortaami oqaaseqaammini allappoq. Taannalu ima nangippoq:

Pisassiissutit utertinneqarsinnaasunngortikkusuppaat
Henrik Sandgreen taamaammat isumaqarpoq raajarniarsinnaanermut pisassiissutinik akuersissutit ukiut tallimat qaangiuppata oqartussanut utertinneqartussanngorlugit aaqqiisoqartariaqartoq.

- Taava pimoorullugu sinerissap qanittuani raajarniarnermi inatsisikkut nalunaarutikkullu oqaatsit ukua atuutsinneqalernissaat piaartumik inissinneqassasut, tassalu; toqqaannartumik imaluunniit toqqaannanngitsumik annerpaamik 15 procentinik pigisaqarsinnaaneq piviusunngortinneqartariaqartoq.

Ukiortaami oqaaseqaammini Kalaallit Nunaanni Aalisartut Piniartullu Kattuffiata siulittaasua Henrik Sandgreen ilaatigut taama allappoq.