KNAPK-mit nalunaarut: Ikiorsiissutissat 24 mio. koruunit nukinginnarsipput
Sineriammut qanittumi aalisarneq - pingaartumik saarullinniarneq - ima ilungersunartorsiorfiutigaaq, ikiorsiissutissat minnerpaamik 24 mio. koruuniusut nukinnginnarsillutik, aalisartut piniartullu kattuffiat KNAPK erseqqissaavoq.
Politikkerit piaarnerpaamik sulisariaqalerput, taamatut isumaqarpoq KNAPK-mi siulittaasoq Henrik Sandgreen, tusagassiorfinnut nalunaaruteqarnermi ilaatigut sineriammut qanittumi aalisartut atugaasa ilungersunarsiartuinnarnernnik erseqqissaassuteqartoq.
Naalakkersuisooqatigiinnissamik isumaqatiginninniartoqarnerani aalisartut piniartullu kattuffiani siulittaasup aalisarneq politikkikkut oqaluuserineqarnissaa kissaatigaa.
- Saarullinniarneq annertuumik ajornartorsiorfiuvoq, taamalu Nunatsinni innuttaasut amerlaqisut nunami allamilu suliffissaarusinnaallutik. Pingaartumik nunaqarfinni aammali Aasianniit kujammut illoqarfinni suliffissaaleqisoqalersinnaalluni, Henrik Sandgreen bundgarnersorluni saarullittat tunisaajunnaarmata pisiarisarunnaarsimallugit Royal Greenlandip nalunaaruteqarsimaneranik innersuussisoq allappoq.
Henrik Sandgreenip ilisimatitsissutigaa, sulqatigiissitat ukioq manna aalisartunut ikiorsiissutissanik nutaanik misissuisussat, ”aalisartunut 2021-mi januaarimiit juunimut aningaasatigut ikiorsiissuteqartoqassanngitsoq nalunaaruteqarsimasut1”.
Inuiaqatigiinnut annertuumik eqquisinnaasoq
- Nalunaarutip taassuma malitsigisaanik Aasianniit kujammut innuttaasut sakkortuumik eqqugaasinnaapput, suliffiit annaaneqaannassanngillat, aammali umiatsiaararsortut aalisariutillu 15 meterit angullugit angissusillit tunisaqarsinnaanerisa killeqangaatsialernerat pissutigalugu nammassinnaanngisaminnik atugaqartinneqalissapput. Taamaammat sineriammut qanittumi saarullinniartut, taamalu Kitaata sineriaani aalisartut amerlanersaat ajornartorsiungaalissallutik, tamanna akuerineqarsinnaanngilaq, aalisartut siulittaasuat erseqqissaavoq.
KNAPK-mi siulittaasup piumasaraa, takornariartitsinermik inuussutissarsiuteqartut siorna ukiorlu manna ikiorserneqarsimanerat assigalugu aalisartut pineqassasut. Taassuma oqaatigaa aalisartut 2020-mi 2,97 mio. koruuninik ikiorserneqarsimasut, takornariartitsisartunut 45 mio. koruunit sinnerlugit pissarsisimasunut sanilliullugit taakku naammanngilluinnartut.
- Aalisarneq, aningaasaqarneq nunamilu suliffissaqarneq aaqqiiffigineqarnissaasa tungaanut allat unitsillugit suliniaritsi, Henrik Sandgreen naggasiilluni oqarpoq.