KNAPK-mi pisoqartoq: Pisortaq tunuartitaagallartoq

KNAPK-mi siulittaasup Henrik Sandgreenip Sermitsiaq.AG-mut uppernarsarpaa, pisortaq Tønnes Berthelsen pingasunngormat atorfimminit tunuartitaagallarsimasoq.

Henrik Sandgreenip taamatut pisoqarneranut suna tunngaviunersoq itisilerlugu oqaatigerusunngilaa, oqaatigaali "inummut tunngasoq" pineqarmat maannakorpiaq oqaaseqarusunnanani.

Pisulli ilungersunartuunera pineqartoq nassuerutgaa, neriuutiginerarpaalu ulluinnarni aqutsisut "inummut tunngatillugu suliaq" marlunngorpat ataatsimiinnermi oqaluueriumaaraat.

- Neriuutigaara suliaq marlunngorpat suliarisinnaassallutigu, tamatuma kingorna nalunaaruteqarumaarpugut, Henrik Sandgreen oqarpoq.

Ulluinnarni aqutsisut siulittaasoq ilanngullugu sisamanik inuttaqarput. Siulittaasup saniatigut inuttaasut tassaapput: Karl Tobiassen, siulittaasup tullia, siulersuisuunernilu ilaasortat marluk tassaallutik Niels Lorentzen aamma Jens Danielsen.

Inuk pineqartoq

Inuup pineqartup nammineerluni paasisinnaannginerarpaa sooq tunuartitaagallarsimanerluni.

- Ilisimatinneqarpunga misissuisoqarniartoq. Suna pineqarnersoq ilisimatinneqarsimanngilanga, Tønnes Berthelsen pisumit sunnerneqarsimarpasittoq oqarpoq.

- Arlaannik ajoquseerusunnginnama saqqummilaannginnissara kissaatigisimagaluarpara. Ilisimaarilluarpara KNAPK-mi pisortatut navianartumik inissisimallunga, tamannalu pissutigalugu politikkimut tunngasumik oqaaseqanngisaannarpunga, Tønnes Berthelsen, aningaasaqarnermut tunngasunik unnerluussisoqanngitsoq pillugu uppernarsaaffigineqarsimalluni erseqqissaasoq oqarpoq.

KNAPK-mi aasaru ileqquusumik ataatsimeersuartoqartussaavoq, oqaatigineqarsimavorlu siulittaasumik tunuartitsinissaq anguniarlugu immikkut ittumik ataatsimeersuartitsinissamik anguniagaqartoqarsimasoq. Paasissutissarli tamanna Sermitsiaq.AG-mit uppernarsaatissarsineqarsinnaasimanngilaq.

Tunuartitsigallarneq Siumumi pissaaneqarniunnermut attuumassuteqarnersoq aamma pillugu uppernarsaasoqarusussimanngilaq.