KNAPK akerlerigaat: Aqutsiveqarfimmi ataatsimi nipisanniarneq aallartissaaq
KNAPK-mi immikkoortortaqarfik Paamiut eqqaanni nipisanniarnerup ammarneqarnissaa pillugu isumaqatigiissuteqarpoq.
Paamiut eqqaanni suanniarneq apriilip 10-ani ammassasoq, Aalisarnermut Piniarnermullu Naalakkersuisoqarfik marlunngornermi ilisimatitsivoq.
Taama pisoqartussanngorpoq naak KNAPK sapaatip-akunnerani kingullermi Royal Greenlandimut Naalakkersuisunullu ukioq manna nipisanniarneq ammarneqarsinnaalersinnagu tunisinermi akinik qaffasinnerusunik sakkortuumik piumasaqaraluartoq.
Suleriaaserli tamanna Paamiuni KNAPK-p immikkoortortaqarfiata akuersaaginnarusunngilaa. Immikkoortortaqarfik KNAPK akerlilerlugu aalisarnerup ammarneqarnissaa pillugu isumaqatigiissusiorsimasoq, immikkoortortaqarfiup siulittaasua Niels Lorentzen KNR-imut oqarpoq:
- Siorna nipisanniartoqannginnera misilittagaqarfigaarput. KNAPK-p Royal Greenlandimut akigissaarnerutitsisoqarnissaa piumasaraa, Namminersorlutik Oqartussallu saavanni akerliussutsimik takutitsineq aaqqissuullugu. Susoqanngilarli, aalisartullu aningaasanik annaasaqaannarput, KNAPK-p Paamiuni immikkoortortaqarfiani siulittaasoq, Niels Lorentzen KNR-imut oqarpoq.
Royal Greenland kiilumut 22 kr-nik tunisinermi akeqartitsiniartoq
Inatsisit malillugit, najukkani tunitsiviit aalisartullu kattuffiisa sinniisuisa aqutsiveqarfinni ataasiakkaani inuussutissarsiutigalugu arnarlunnik nipisanniarnermi piffissaq aalisarfissaq qaqugu aallartinneqassanersoq isumaqatigiissutigisassavaat.
Royal Greenland Sermitsiaq.AG-mut paasissutissiivoq, ingerlatseqatigiiffik kiilumut 22 koruuninik bonusisiassanilu 1 koruunimik akeqartitsinissamut piareersimasoq, taakkualu siorna aalisarnerup aallartinnerani akit assigaat.
KNAPK isumaqarpoq, taakkua annikippallaartut. Siorna tunisinermi akit aamma aaqqiagiinngissutigineqarput, Royal Greenland kiilumut 22 koruuninik aamma akeqartitserusummat. Aaqqiagiinnginneq aalisarnerup kiilumut 22 koruuninik bonusisiassanilu 1 koruunimik akeqartitsilluni ammarneqarneranik inerneqarpoq.
Aqutsiveqarfimmi 1E-mi nipisanniarneq apriilip 10-ani 2023-mi aallartissaaq:
