Sungiusaasumik soraarsitsineq
KNAK-p siulittaasua eqqunngitsunik oqaluppoq
KNAK siulittaasuungallartup Gert Fleischerip, Tekle Ghebreluli sooq sungiusaasutut soraarsitaasimanera pillugu piviusumik oqalussinnaanngilaq.
Tekle Ghebrelulip ammip qalipaataanik immikkoortitaalluni misigisaqarnermini tusagassiuutinut saaffiginninnermini isumaqatigiissutini unioqqutitsisimasutut soraarsitaaneranut pissutit ilagigaat, Gert Fleischer tunngavilersuisimavoq, tamannalu KNAK-mi siulersuisuinit, siulittaasuusimasoq John Thorsen kisimi pinnani kamaataatigineqarsimavoq.
Isumaqatigiissummik takuninneq
KNR-p nunanut allanut unammisartut sungiusaasuata isumaqatigiissutaa takusimavaa, isumaqatigiissulli naapertorlugu Tekle siulersuisunut nalunaaruteqaqqaartigani tusagassiortunik oqaloqatiginnissinnaanera piumasaqaataanngilaq.
"KNR-ip Gert Fleischer GBU-llu siulittaasuata tullia, Kent Kielsen tallimanngormat oqaloqatigai. Taakku arlaannaataluunniit Tekle Ghreblelulip tusagassiutinut oqaaseqarniarnermini siulersuisut attavigeqqaassagai isumaqatigiissutip suani allassimanersoq oqaatigiumanngilaat, KNR allappoq.
- Tekle tusagassiutinut attaveqartinnani siulersuisunit akuerineqaqqaartarnissaanut isumaqatigiissut uanga suliarinngilara. Aatsaat ippaassaani (pingasunngormat, aaqq.) Teklemut isumaqatigiissut atuarluarpara, Gert Fleischer KNR-ip tallimanngormat ualikkut oqaloqatimmagu oqarpoq.
KNR-mut taama nassuiaateqarnermini (pingasunngornermi 16. august aatsaat isumaqatigiissut atuarsimanerarlugu, aaqq.) piviusunut naapertuussinnaanngitsoq, takutiinnarpaa.
1 augustimi apeqqarissaarneq
Gert Fleischer 1 augustimi Sermitsiaq.AG-mit apeqqarissaarfigineqarami oqarpoq:
"Kisianni uani oqaatigissavara, Teklep isumaqatigiissutaa ullut arlaqanngitsut matuma siorna aatsaa takusimangakku. Taamanikkut isumaqatigiissut qanoq imaqarnersoq ilisimasimanngilara."
Gert Fleischerip oqaaseqarnera immiunneqarsimammat Sermitsiaq.AG-mit uppernarsarneqarsinnaavoq.
Oqaaseqarumanngitsoq
Tallimanngornermi ualiartortoq Gert Fleischeri oqarasuaatikkut pissariaringatsigut Sermitsiaq.AG oqaloqatigerusunnginnerarpaa.
Nunanut allanut unammisartunut sungiusaasumut isumaqatigiissut pillugu sooq sallusimasinnaanera nassuiaammik pissarserusussimangaluarpugut.