Skip to main content

KNAK: Nunanut allanut unammisartut sungiusaasuata soraarsitaasup isumaqatigiissutini malinngilaa

Isikkamik arsaattartut nunanut allanut unammisartuisa sungiusaasorisimasaat Tekle Ghebrelul kattuffimmut isumaqatigiissutini malissimanngilaa. Tamanna pissutigalugu soraarsitaavoq, KNAK-mut siulittaasoq nutaaq Gert Fleischer oqarpoq

- Suna tamarmi 2015-mi aallartippoq, taamani Nunatsinni pissartanngorniutivinnermi unamminerup nalaani sakkortuallaamik pissusilersorsimanera pissutigalugu Tekle Ghebrelul siulersuisunit oqaatsitigut mianersoqqussumik tunineqarsimalluni, John Thorsenip sisamanngormat siulersuisuni amerlanerussuteqartut sungiusaasumik soraarsitsinissamut ikinnerussuteqarnini pillugu siulittaasutut taamaatinnerata kingorna, Gert Fleischer Kalaallit Nunaani Arsaattartut Kattuffiani siulittaasunngortoq oqarpoq.

Aamma atuaruk: KNAK aningaasaliisartunik annaasaqariaannaavoq

Nunanut allanut unammisartunut sungiusaasuusimaasup isumaqatigiissutini malissimanngilaaq, Snapchat-ikkummi pisoq pillugu KNAK-mut nalunaaruteqaqqaanngiivilluni tusagassiuutinut saaffiginissuteqarsimavoq, Gert Fleisecher nassuiaavoq.

- Tekle Ghebrelulip isumaqatigiissutini malinngilaa, tamannalu pissutigalugu siulersuisut iliuuseqarput taanna soraarsillugu, taanna oqarpoq.

Isumaqatigiissummut pituttorsimasoq

- Nunanut allanut unammisartunut sungiusaasoq killilersorneqarani oqaaseqarsinnaatitaannginnami?

- Ilumut, nunanut allanut unammisartunut sungiusaasoq allatuulli killilersorneqarani oqaaseqarsinnaatitaavoq. Kisianni nunanut allanut unammisartunut sungiusaasup ilisimassavaa isumaqatigiissummut pituttorsimasuunini. Pisut KNAK-mut tunngassuteqartillugit, nunanut allanut unammisartunut sungiusaasoq tusagassiuutinut attaveqannginnermini siulersuisunut ilisimatitseqqaartussaavoq. Uagut aamma siulersuisuni ilaasortat siulersuit ilisimateqqaarnagit, pisut tusagassiuutinut oqaluttuarisinnaanngilagut, Gert Fleischer nassuiaavoq.

Aamma atuaruk: Futsalimi unammisartunut sungiusaasoq taamaatippoq: GBU-mut tatiginninngilanga

- Taava, Tekle Ghebrelulip isumaqatiissutini malittariaqarsimangaluarpaa?

- Aap. Kisianni uani oqaatigissavara, Teklep isumaqatigiissutaa ullut arlaqanngitsut matuma siorna aatsaa takusimangakku. Taamanikkut isumaqatigiissut qanoq imaqarnersoq ilisimasimanngilara. Siulersuisut sungiusaasulli ilisimasanik avitseqatigiissimanerat naammassimanngilaq. KNAK-mi attaveqatigiinnerluttoqarsimavoq, Gert Fleischer nassuerpoq.

Sakkortuallaartoq

- KNAK nunanut allanut unammisartunut sungiusaasup qanoq pissuseqarnissaanik maleruaqqusarpa?

- Aap, nunanut allanut unammisartunut sungiusaasup qanoq pissuseqarnissaanik maleruaqqusaqarpoq. Maleruaqqusat, unammisartunut, nunanut allanut unammisartunut sungiusaasunut aamma siulersuisunut atuupput. Timersortartorpalaanngitsumik pissusilersoraanni atorfimmit soraarsitaasoqarsinnaasoq, KNAK-mi maleruaqqusaqarpoq.

Aamma atuaruk: KNAK siulittaasua nunanut allanut sungiusaasoq soraarseriarlugu tunuartoq

- Aamma erseqqissaatigissuara Nunatsinni isikkamik arsaattartunut nunanut allanut sungiusaasuungaanni qaffasinnerusumik atorfeqarsinnaanngimmat. Tamannalu tunngavingalugu pissuserissaarnissaq aamma piumasaqaataavoq. Maniitsumilu futsalimik pissartanngorniutivittoqarnerani Tekle Ghebrelulip pissuserisimasaa akuersaarneqarsinnaanngilluinnarmat. Meerarlu sianiinneraalluni kamassaarisoq Tekle Ghebrelulip alaannarsimasussaangaluarpaa. Maniitsumi pisup takutiinnarpaa meeqqamut oqaassinermi nalaani taanna pissusiminik aqutsisinnaanngitsoq. Inuttut pissusaa pinngilarput, kisianni taassuma kamassarissusini ilaatingooriarluni takutittarpaa, tamannalu akuersaarneqarsinnaanngilluinnarpoq, KNAK-mi siulersunngorlaaq oqaluttuarpoq.

- Manitsumi pisunut paasissutissat suminngaanniit pissarsiaraasigit?

- Paasissutissarpassuarnik pissarsisimavugut. Innuttaasut arlallit saaffiginnissuteqarsimapput, taakkuli Tekle Ghebrelulip meeqqamut oqaassinermini sakkortoorujussuarmik pissuseqarsimasoq nassuiaatigisimavaat.

Aamma atuaruk: Nunanut allanut unammisartunut sungiusaasoq tupaqqasoq: Soraarsitaavunga

- Tekle Ghebrelulimik soraarsitsineq ammip qalipaataanik immikkoortitsinerunngilaq. KNAK ulluni kingullerni arlalippassuarnik pisuutinneqaqattaarpoq, oqaatigissavaralu unnerluussinerit eqqortuunngimmata. Ammip qalipaataanik immikkoortitsisuunngilagut, Gert Fleischer oqarpoq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER