Kalaallit Nunaani Arsaattartut Kattuffiat
KNAK-imi tukattoqarpoq: Maleruaqqusanik unioqqutsitsineq
John Thorsenip siulittaasutut tunuarnerata kingorna, Kalaallit Nunaani Arsaattartut Kattuffiani (KNAK) tukattorujussuanngorsimavoq
KNAK-mi siulersuisut piumasartik malillugu iliuuseqarnerminni maleruaqqusaq taanna kisiat unioqqutissimanngilaaq, Kattuffimmi ulluni 7. aamma 8. oktober ataatsimeersualerpat, kikkut qanorlu amerlatigisut siulersuisunut qinigassanngortissanersut nalornissutigineqarpoq.
Siulersuisunngortoq
John Thorseni siulersuisuni tunuassalluni aalajangermat, siulittaasup tullia Gert Fleischer siulittaasunngorpoq, Jakob Ludvigsenilu siulersuisuni ilaasortanngortinneqarpoq, sunalu tunngavigalugu siulersuisunut ilaasortanngortinneqarsimanera KNAK-mut paasissutissiarineqarsimanngilaq.
Sermitsiaq.AG-p massakkut siulittaasuusoq Gert Fleischerimut paasiniarsimangaluarpaa siulersuisut qanoq inissisimanerinik, aamma kikkut qanorlu amerlatiginersut qinigassanngortissanersut. Pissarsiarisassaasimanngilarlu.
Sinniisussaasoq siulleq qatangiinnarneqartoq
Sermitsiaq sooq nalunaarutinik soqutiginninnersoq, siulersuisuni siulittaasup paasisinnaanngilaa. Siulersuisunilu siulittaasup nalunaarutinik tunniussaqarusunnginnerminik pissutissaqarsimagunarpoq. Massakkummi paasinarsivoq, John Thorsenip taartissaanik sinniisumik ivertitsiniarnermi, KNAK-p David Janusseni qatangiinnarsimagaa.
Eqqartuussissuserisoq Finn Meinel, B-67-imi siulersuisuni siulittaasoq, Sermitsiaq.AG-imut paasissutissiivoq, siulersuisut ataatsimiinnerini nalunaarusiamik piffissami sivitsortumi pissarsiniarsimangaluarluni, taamaasiornikkummi paasisinnaalissangamiuk kattuffimmi suut ajunngitsumik ingerlanersut suullu aaqqitassaanersut.
Nalunaarusiarlu taassuma pissarsiarisimavaa – KNAK-minngaanniit pissarsiarinagu allamit pissarsiarisimavaa – tassanilu kikkut sinniisussatut siullertut tullertullu inissisimaneri allassimavoq. Nalunaarusiami erserpoq, David Janussen sinniisussatut siullertut qinigaasimasoq Jakob Ludvigsenilu sinniisussat aappaattut qinerneqarsimalluni.
Kukkuneq utoqqatsissutigigaa
- Taamaammat KNAK-mut attaveqarpunga apeqqutigalugu, sooq Jakov Ludvigseni siulersuisuni ilaasortanngortinneqarsimanersoq, Finn Meinel Sermitsiaq.AG-mut paasissutissiivoq.
- Kingorna KNAK akissuteqarluni allaffigaaga sinniisussanik kukkusimanertik utoqqatsissutigalugu. KNAK-p nalunaarusiamik nassaasinnaannginnertik pissutaaneralugu nassuiaateqarsimasut, Finn Meinelip oqaatigaa. Massakkullu David Janussen siulersuisuni ilanngunneqarsimalersoq Jakob Ludvigsenilu tunuartinneqarsimasoq, aamma paasisimavaa.
Ataatsimeersuarnissamut sapaatit-akunneri arlaqarunnaarnerini, John Thorsenip siulittaasuujunnaarsimanera KNAK-mi malugisimagunarpaat, kattuffimmimi uivertoqarpoq. Ataatsimeersuarnissarluunniimmi sumi illoqarfimmi ingerlanneqassanersoq suli ilisimaneqanngilaq.
Paatsiveqanngitsut
KNAK-mi siunnersortaasoq Steffen Silassenip Sermitsiaq.AG-mut paasissutissiivoq, siulersuisunut aamma siulersuisut siulittaasussaattut qinigassanngortittunik suli tigusaqarsimanatik.
- Qanoq amerlatigisut siulersuisuniippat?
- Eqqaamanngilara. Kikkulluunniit siulersuisuni ingerlaqqinnersut eqqaamanngilara, aamma siulersuisuni issiaviit qassit inuttaqannginnersut eqqaamanngilara. Suna tamarmi inisseriarpat tusagassiuutinut nalunaaruteqarumaarpugut, Steffen Silassen oqarpoq.