Kleemann ukiuni 20-ni siulittaasooreerluni tunuarniarpoq
Nuka Kleemann Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmi pisortanngornini pissutigalugu tunuartussanngormat, Timersoqatigiit Kattuffiat ukiamut nutaamik siulittaasortaassaaq.
Timersoqatigiit Kattuffianni ukiorpassuarni siulittaasoq, Nuka Kleemann, siulittaasutut tunuarniarluni aalajangerpoq.
Kattuffiup ukiumoortumik oktobarimi ataatsimiinnerani tamanna pissaaq.
- Nikallungallunga aalajangerpunga. Timersornermut ukiut 40-t sinnerlugit suleqataasarpunga. Siullermik timersortartutut kingornalu taekwondortartut kattuffianni siulittaasutut aamma Timersoqatigiit Kattuffianni siulittaasutut, Nuka Kleemann Sermitsiaq.AG-mut taama oqarpoq.
Kattuffimmi siulittaasup Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmi pisortanngornermi kingorna tunuarniarluni aalajangerpoq. Atorfik 1. juni suliffigilissavaa.
Attuumassuteqarpallaarnissaq pinaveersaarusukkaa
Attuumassuteqarpallaarnermik ajornartorsiuteqartoqalernissaanik kissaateqarnera pissutaavoq.
Kleemannilli kattuffimmi suliniutit arlallit naammasseqqaassallugit sulisitsisussaminut isumaqatigiissuteqarpoq, aatsaallu oktobarimi tunuartussaavoq.
- Timersoqatigiit Kattuffianni arlalinnik suliniuteqarama suliaq iluamik naammassiniarpara.
- Ukiamullu aamma ukiunik 70-nik nalliuttorsiortussaavugut, Nuka Kleemann oqarpoq.
Piffissami naalakkersuisoqarfimmi pisortaallunilu kattuffimmi siulittaasuunermini Timersoqatigiit Kattuffianut tunngasunik aalajangiisassanngilaq, taanna nassuiaavoq.
Nuka Kleemann Timersoqatigiit Kattuffianni 2003-mi siulittaasutut qinerneqarpoq. Timersornermut tunngasunik suli suleqataasarnissani oqaatigaa, kisianni pingaarnertut akisussaasutut pinnani.
Nuka Kleemann aamma naalakkersuisoqarfimmi pisortanngorniarluni Ilulissani Perorsaanermik Ilinniarfimmi rektoritut atorfimminit tunuartussanngorpoq.