Klassini atuartut ikilisinnissaat akisussaaq
Meeqqat atuarfiini klassit amerlanerpaamik 18-inik atuartoqartassappata, tamanna ilinniartitsisunut amerlanerusunut akissarsiaqartinnerinnaanut ukiumut 25 milliuunit koruuninik naleqassaaq. Atuartut klassini ikilisinneqassappata ilinniartitsisutut atorfiit nutaat 62-it pisariaqartinneqassasut, naatsorsuinerup takutippaa.
Peter Olsenip apeqquteqaataa akiniarlugu Ilinniartitaanermut Naalakkersuisoq Ane Lone Bagger naatsorsuisimavoq. Naatsorsuinermi atuaqatigiit ilaasa marlunnik ilinniartitsisoqarsinnaanerat aamma ilinniartitsivinnik amerlisaasariaqarneq ilanngunneqarsimanngillat.
Atuarfinni atuaqatigiiaat amerlanerpaamik 18-iusassappata, atuartullu ilaat klassinut allanut nuutsinneqarsinnaappata, taa klassinik atuartitsivissanik nutaanik 47-nik pilersitsisoqartariaqartoq, naalakkersuisup naatsorsorpaa. Atuaqatigiiaat nutaat pilersinneqartariaqartut kommunemiit kommunemut amerlassutsimikkut assigiinngiiaarput:
- Kommune Kujalleq: atuaqatigiiaat arfineq-pingasut
- Kommuneqarfik Sermersooq: atuaqatigiiaat 29-it
- Qeqqata Kommunia: atuaqatigiiaat marluk
- Kommune Qeqertalik: atuaqatigiiaat pingasut
- Avannaata kommunia: atuaqatigiiaat tallimat
Nuummi atuarfimmik marlukkaanik atuaqatigiilimmik pilersitsineq pisariaqartinneqalissasoq, Ane Lone Baggerip nalilerpaa.
Nuummi atuaqatigiiaat annertussusaat
Nuuk aallaavigalugu atuartut atuaqatigiiaanni qanoq ullumikkut amerlatiginersut naatsorsorneqarsimapput. Nuummi illoqarfimmi atuarfinni naatsorsuinerit oktobarip aallaqqaataani 2018-imeersuupput:
Atuartut 1-18-it: Atuaqatigiiaat 49-it
Atuartut 19-21-t: Atuaqatigiiaat 27-t
Atuartut 22-25-t: Atuaqatigiiaat 36-t
Atuartut 26-t: Atuaqatigiiaat arfinillit
Peter Olsenip meeqqat atuarfiini atugassarititaasut pitsanngorsarusuppai, taamaattumillu atuaqatigiiaat qanoq amerlatigineri pillugit apeqquteqarsimalluni.