KJ Greenland Ilulissani timmisartoqarfissap illutassaanik sanassasoq
KJ Greenland Ilulissani timmisartoqarfissap illutassaanik sanassaaq. Suliffeqarfiup Kangiani Illorsuaq sanasimasani tunniuteqqammerpaa.
Kalaallit Airports International A/S-ip (KAIR) Ilulissani timmisartoqarfissap illorsuartassaata kiisalu kiffartuussisarfissap aamma timmisartunik tikittussanik aallartussanillu nakkutilliisoqarfissap sananeqarnissai pillugit KJ Greenland ullumi isumaqatigiissummik atsioqatigisimavaa.
KJ Greenlandimik isumaqatigiissuteqarneq, 2020-mi novembarip qaammataani suliarinnittussarsiuussinerup inerneraa, isumaqatigiissummillu ullumi atsioqatigiinnikkut suliarinnittussarsiuussineq naammassineqarluni.
Kalaallit Aiports International A/S-imi suliniuteqarnermut pisortap Aviaaja Karlshøj Knudsenip atsioqatigiinneq naammagisimaarluarpaa.
- Illutassanik suliarinnittussarsiuussineq iluatsilluarneqarsimavoq, KJ Greenlandimillu suleqateqarnissarput qilanaaraarput. Sulinitsinni angusaqarluarnitsinni Nuummi Ilulissanilu mittarfiliassat illutassallu suliarineqarnissaat aallartissinnaanngorpavut, taanna oqarpoq.
Terminali 4720 m2-iusoq sananeqassasoq
Illutassat timmisartoqarfissallu nutaap allat atortussai 2024-mi atoriannaanngorlugit suliarineqareersimassapput, nivariaqqaarnerlu 2022-mi aasakkut pissalluni.
KJ Greenland 2011-mi pilersinneqarpoq, piginnittuullutillu Karl aamma Jens Jensen kiisalu aningaasaqarnermi pisortaq Palle Bendtsen 2017-imi piginnittooqataalersoq. Suliffeqarfik Kalaallit Nunaata avannaani sanaartukkanik annertuunik arlalinnik suliaqarsimavoq. Ilaatigut Kangiani Illorsuaq aamma Hotel Ilulissat sanasimavai.
KJ Greenland A/S-ip ilaasunut terminalissaq 4720 m2-iusoq kiisalu kiffartuussivissaq 1900 m2-iusoq suliarissavai. Illut pineqartut Zeso Architectsimit titartarneqarsimapput, taanna aamma Nuummi Timmisartoqarfissap illorsuartassaanik titartaasimavoq.