Kitaata sineriaani timmissat toqungasut: Timmissat nualluutaat maannamut takuneqarsimanngitsoq pissutaavoq
Timmissat nualluutaat toqqutaakkajuttartoq appani marlunni nassaarineqarpoq, taakku kitaata sineriaani timmissat toqungasut akornanni nassaarineqarpoq. Inuit tunillatsissinnaapput, kisianni tunillatseratarsinnaaneq appasippoq, Uumasunut Nakorsaqarfik Inuussutissalerinermullu Oqartussaaffik ilisimatitsivoq.
Timmissat nualluutaat nutaaq Kalaallit Nunaanni siullermeerluni nassaarineqarpoq.
Uumasunut Nakorsaqarfik Inuussutissalerinermullu Oqartussaaffik tusagassiuutinut nalunaarummi taama ilisimatitsivoq. Nassaarneq marsimi siorna pisimasoq tassani atuarneqarsinnaavoq, inuit arlallit Kalaallit Nunaata kitaata sineriaani sumiiffinni arlalinni timmissanik toqorarsimasunik takusaqarsimapput.
Uumasunut Nakorsaqarfik Inuussutissalerinermullu Oqartussaqarfiup, Pinngortitaleriffiup Danmarkimilu Inuussutissalerinermut Aqutsisoqarfiup suleqatigiinnerisigut appat marluk Fyllas Bankemeersut mitillu tallimat Qeqertarsuarminngaanneersut Statens Seruminstitut sinnerlugu Danmarkimi Københavnip Universitetiani timmissat nappaataannut maanna misissorneqarsimalerput.
Timmissanit toqqutaakkajuttartoq
Misissuinermi timmissat nualluutaat sakkortuumik napparsimalersitsisartoq appani misissorneqartuni marlunni nassaarineqarpoq. Virusip sakkortuumik napparsimalersitsisarnerata timmissanut toqqutaakkajuttarneranik kinguneqartarpoq, Uumasunut Nakorsaqarfik Inuussutissalerinermullu Oqartussaqarfik ilisimatitsivoq.
Fyllas Banke timmissanik imarmiunit nunanit assigiinngitsuneersunit ukiisarfiuvoq pingaarutilik, appallu marluk nassaarfigineqartut suminngaanneernersut ilisimaneqanngilaq. Appat amerlasuut Inngikitsulimmeersut Islandimeersullu amerlasuut marsimi tassaniittarput, taamaattorli Canadameersunit Nunattalu kitaata avannaaneersunit aamma appaqartarluni.
Inuit virusimik H5N1-imik tunillatsissimasunit timmissanit tunillatsissinnaapput, naak aarlerinaateqarpallaanngikkaluartoq, Uumasunut Nakorsaqarfik Inuussutissalerinermullu Oqartussaqarfik ilisimatitsivoq: Taamatuttaaq inuit virusimik taamaattumik tunillanneqarsimasut napparsimarujussualersarnerat qaqutigoorpoq.
Timmissat nualluutaat nalinginnaasumik qaqutiguinnaq inunnut tuniluuttarpoq, taamaattoqartillugulu tunillatsittoq timmissat imaluunniit timmiaatit qanillisimasarlugit.
Asimi timmissanik toqungasunik nassaaraanni Uumasunut Nakorsaqarnermut Inuussutissalerinermullu Oqartussanut uumasut@nanoq.gl-imut imaluunniit 34 50 00-imut ammasarfiup iluani, tassa ataasinngorneq, marlunngorneq, sisamanngorneq tallimanngornerlu nal. 9.00-imiik 15.00-ip tungaanut saaffiginnittoqarsinnaavoq.