Kissakkaluttuinnarnerup nunap ataanut sunniutissai misissorneqarput
Avannaata Kommunia, DTU suleqatigalugu Ilulissat eqqaani nunap ataanik misissuileruttorpoq. Kommuni nittartakkamini taama ilisimatitsivoq.
Nunap qeriuaannartup aakkiartulersimanera nunap ataanut, nunallu qanoq akuugaaneranut sunniutissai pillugit misissuisoqaleruttorpoq. DTU-mi, Danmarks Tekniske Universitetimi ilisimatuut Ilulissani maanna misissuipput, nunap ataanik misissuillutik. Avannaata Kommunia nittartakkamini taama ilisimatitsivoq.
Ilisimatuut suleqatigiit Ilulissat avannaani narsaamanersuaq maanna paasiniaaffigileruttorpaat.
Nunap ataa qanoq sunnerneqassava
Nunap ataa nunamik, imermik taratsumillu qanoq akoqartiginera misissorneqarpoq. Misissuinermi paasiniarneqarpoq nuna qeriuaannartoq aakkiartulerpat nunap ataa qanoq ilissanersoq.
Paasisat aallaavigalugit kommunimi sanaartugassat, soorlu mittarfissaq, aqquserngit illoqarfiullu ineriartortinneqarnera qanoq pitsaanerpaamik ingerlanneqarsinnaanersoq tikkuunneqarsinnaavoq.
- Qillerisimavugut ilaatigut mittarfittaassap aqquserngiornissaata pilersaarusiorneqarnerani, qillerinikkullu qaqitat takutippaat, annertoorujussuarmik sikumik akoqartoq, Arctic DTU-mit Thomas Ingeman-Nielsen oqaluttuarpoq.
Sikumik akoqarnerujussua isumaqarpoq, kianneruleriartornerassutsip sakkortusiartornera ilutigalugu sikullu aakkiartorneranit nunap ataata kiviartulernissaa ilimanaatilerujussuusoq.
Imeqarfik sunnerneqarsinnaasoq
Ilulissap imeqarfiata naqqa qanoq tarajoqartiginersoq ilisimatuut aamma paasiniarsimavaat. Sumiiffik annertungaatsiartumik tarajoqartoq paasineqarpoq. Aamma imeqarfiup naqqa tarajoqangaatsiarpoq.
- Taamaalilluni soqutiginarsivoq nuna qeriuaannartoq aalerpat imissamut qanoq sunniuteqarsinnaanersoq. Mittarfiup eqqaani qillerigatta takuneqarsinnaavoq imeq nunamiittoq immamisut tarattumik akoqarsinnaasoq, Thomas Ingeman-Nielsen oqaluttuarpoq.
2021 naalerpat inernerit qularnaannerusut
Ilisimatuut suleqatigiit naatsorsuutigaat ilisimasat tamakkiisut aallavigalugit nalunaarusiaq ukioq manna naatinnagu naammassisinnaassallugu. Paasissutissallu Avannaata Kommunianut tunniunneqarumaarput.
Suliniut DTU, Avannaata Kommunia, Århus Universitet, Nukissiorfiit aamma EU suliniut Nunataryuk akunnerminni suleqatigiissutigaat.