Kisitsinermi kukkusoqartoq: Qernertanik qilalugartasseeqqittoqartoq
Savissivimmi qilalukkanik qernertarniarneq ammaqqinneqarpoq. Pisassiissutit sinneruttut pingasuupput.
Savissivimmi qernertanik qilalugartassiissutit tamakkerneqarnerat, aalisarnermut, piniarnermut nunalerinermullu naalakkersuisoqarfiup ataasinngormat nalunaarutigimmagu, kamannermik pakatsinermillu pilersitsivoq.
Qaanaami piniartut qernertanik qilalugarniarneq unitsinneqarmat akerliussutsimik takutitsipput.
Ukiuni marlunni pisat kisinneqarneri maanna kukkussutigineqarsimasoq paasinarsivoq, taamaattumillu piniarneq ammarneqaqqippoq.
- Aalisarnermut, Piniarnermut Nunalerinermullu Naalakkersuisoqarfiup Avannaata Kommunia suleqatingalugu paasisimavaa Savissivimmi qilalukkat qernertat 2017-imi aamma 2018-imi pisat nalunaarsornerani kukkusoqarsimasoq, tusagassiuutinut nalunaarummi tamanna oqaatigineqarpoq.
- Tamatumuuna nalunaarutigineqassaaq Savissivik suli pingasunik qernertanik qilalugartassiissuteqartoq piniarnerlu ammaqqinneqartoq.