Kisitseqqissaarnerup kingorna: Kalaallit Nunaat nerrivimmi arsaararnermi finalissaaq

Kalaallit nerrivimmi arsaarartartut nunanut allanut unammisartuisa Island Games 2017-imi Gotlandimi ujaminnallutik angerlanissamut anguniagaat naammassineqalerpoq. Ujaminnattaa kuultiussanersoq imaluunniit sølviussanersoq apeqqutaaginnalerpoq.

Unammisut ippassaq ilimagineqartunut allanut Guerseymut pissanganartumik unamminerisa kingorna tamanna paasinarsivoq.

Iligiikkarluni unammineq aalajangiisoq
Iligiikkaat taakku marluk gruppespillimi aalajangiisussamik unammipput, tassanilu kalaallit ingerlaqqinniarunik ajugaaginnartussaapput.

Unammineq sunaaffa naligiiffiungaatsiartussaq, kisianni naggataagut Ivik Nielsen aalajangiisumik pointinnatsitsivoq, Kalaallit Nunaallu ajugaavoq. Tamatuma kingorna minutsit pissangaffiusut ingerlapput, tassani suna tamarmi kiseqqissaarneqarpoq. Kalaallit Nunaat imminnut akerleriisillugit sanilliunnerini pitsaanerusimasoq tassani paasinarsivoq, ilaatigut arlaleriarluni ajugaarujussuarnerit pissutigalugit.

Semifinalimi ajugaaneq
Kalaallit nunanut allanut unammisartui taamaalillutik semifinalimut anngupput, tassani Åland unammivaat. Poul Jørgen Petersenip aamma Ivik Nielsenip ajugaanerisa kingorna, Kalaallit Nunaat tassani 4-3-mik ajugaavoq.

Taamaalillutik finalernissaminnut piareerput, tassanilu unammeriikkatik Guernsey unammissavaat. Semifinalip aappaani Gotlandimut 4-3-mik ajugaanikuugamik.

Akiniaaniartut
Nunanut allanut unammisartunut sungiusaasup Tommy Jørgensenip finalimut anngunneq tulluusimaarutigalugulu pissanganartippaa, taanna unammineq maanna unamminermit siullermit allaanerujussuussaaq.

- Finalerneq allarujussuussaaq, Guernsey akiniaarusulluni tamaviaartitsisussaavoq. Ivik Nielsen, Aqqalu Nielsen, Poul Jørgen Petersen, Karlinannguaq Lundblad, Rosa-Marie Petersen aamma Melissa Larsen tamarmik unammilluaqaat, Hugo Svensson, Arne Hermann aamma Tommy Jørgensen tamarmik ataatsimoorluarput, taakkulu iligiit finalimut anngutsitsipput, sungiusaasoq oqarpoq, nangillunilu:

- Kalaallit Nunaanni nerrivimmi arsaarartartut Island Gamesimi siullermeerlutik iligiikkaarnermi finalerput, qilanaaqaagullu.

Finalerneq ullumi marlunngornermi Nunatsinni nalunaaqutaq malillugu 09.00 pissaaq, GTTF-ip Facebookimi quppernerani toqqaannartumik isiginnaarneqarsinnaassaaq.