Timmisartuussinerit

Kisermaassisoqarunnaarnera Greenland Express Airimit nuannaarutigineqarpoq

'Timmisartuussisinnaanissaminnut naalakkersuinikkut akuersissummik tunineqarneq' Greenland Express Airip nuannaarutigaa, taamaasilluni Kalaallit Nunaanni aamma timmisartuussisinnaalissalluni

Gert Brask, pilotsæde
Greenland Express Airimi pisortaallunilu pilersitsisoq, Gert Brask

Timmisartuutileqatigiiffiit Greenland Express Air aamma Aluu Airlines 'timmisartuussisinnaanissaminnut naalakkersuinikkut akuersissummik tunineqarput', taamaasillutillu Kalaallit Nunaanni timmisartuussisinnaalissallutik. Tamannalu Greenland Express Airimit nuannaarutigineqarpoq.

- Kalaallit Nunaanni kisermaassilluni timmisartuussisarnerit tamaannga killeqarpoq, Greenland Express Airimi pisortaaneq Gert Brask tusagassiutinut nalunaarummi allappoq.

Illoqarfinni assigiinngitsuni arfineq marlunni timmisartuussisalernissaq Greenland Express Airimit aggustusimit aallartissasut naatsorsuutigineqarpoq.

- Naalakkersuisunit aalajangerneqartoq nuannaarutigeqaarput. Kalaallit Nunaata iluani aamma timmisartuussisinnaalernissarput nuannaarutigaarput, tassami Billundimit Københavnimiillu Kalaallit Nunaannut angalasut illoqarfiinut timmisartuussinnaalissagatsigit. Akigitinneqartut aamma malunnassapput, periarfissanimmi ammaasoqassaaq, Gert Brask oqarpoq.

Timmisartoq qulimiguulillu
Nuummi, Upernavimmi, Ilulissani, Aasianni, Sisimiuni, Maniitsumi, Paamiuni kiisalu Nunatta kujataani qulimiguulimmik angallassisisalernissaq Greenland Express Airimit sulissutigineqaleruttorpoq.

Timmisartuutileqatigiiffik timmisartumik pisissasoq imaluunniit attartussasoq aamma sulissutigineqarpoq.

- Illoqarfinni timmisartuussisarnissanut pilersaarut, timmisartut aamma qulimiguullit pillugit paasissutissat allarpassuillu juunimi ilisimatitsissutigineqassapput, Gert Brask ilisimatitsivoq.

Naalakkersuisut politikkikkut Aluu Airlines aamma Greenland Express Air akuersissummik tunereerpaat. Suliassaq tullinnguuttoq tassaavoq Angallassinermut Aqutsisoqarfiup timmisartuutileqatigiiffiit taakku timmisartuussisalernissaannut akuersissut.

Taamaattumik Angallassinermut Aqutsisoqarfiup akissuteqaateqarnissaa timmisartuutileqatigiiffinnit suli utaqqineqartariaqarpoq.

Powered by Labrador CMS