Kisermaassinerup allanngortinneqarnissaanik pilersaaruteqartoqanngitsoq

Naalakkersuisut Royal Arctic Linep Kalaallit Nunaannut Kalaallillu Nunaanniit kisermaassilluni assartuisarnerata atorunnaarsinneqarnissaannik pilersaaruteqanngillat.

Royal Arctic Line, RAL, Nuka Arctica

Demokraatineersoq Jens-Frederik Nielsen Royal Arctic Linemut (RAL) atatillugu Naalakkersuisunut arlalinnik apeqquteqarsimavoq.

Ilaatigut paaserusussimavaa, RAL-ip imaatigut assartuinermi kisermaassiffigisaani Atlantikukkoorluni Kalaallit Nunaannut assartuisarnerup ammanerulersinneqarnissaanik Naalakkersuisut pilersaaruteqarnersut. Apeqqut aasaq kingulleq aamma sammineqarsimavoq. Tassani Savalimmiut kisermaassisuunerup iliuuseqarfigineqarnissaa piumasarisimavaa, RAL-ip Savalimmiunut angalasarmat, Savalimmiunilu umiarsuaatileqatigiiffiit Kalaallit Nunaannut angalaqqusaannginnerat pissutigalugu.

Naalakkersuisulli akissutaat naapertorlugu, RAL unammillerneqarnissamut ernumassuteqartariaqanngilaq:

Ammanerulersitsisinnaaneq misissorluarneqarsimanngitsoq

- Royal Arctic Linep akuersissutaata atorunnaarsinneqarnissaa pilersaarutigineqanngilaq. Kalaallit Nunaannut, Kalaallit Nunaannit, Kalaallit Nunaatalu iluani imaatigut assartuinerup avammut ammanerulersinneqarnissaa, piffissami qaninnerusumi misissorluarnegarnikuunngilaq. Taamaalilluni aamma naatsorsuusiorfiginegarnikuunngilaq, Attaveqaasersuutinut Naalakkersuisoq Mariane Paviassen (IA) Jens-Frederik Nielsenimut akissuteqarluni allappoq.

Mariane Paviasenip aamma Assartuussineq pillugu Isumalioqatigiissitap 2011-mi isumaliutissiissutaa innersuussutigaa:

- Apeqqut naatsumik sammineqarsimavoq, negeroorutegartullu ataatsimit amerlaneruppata inuiaqatigiit aningaasaqarnerinut imminut akilersinnaassanngitsutut mianersortumik nalilernegarluni, akissuteqaammini allappoq.

Akigitat qaffassimanerannik illersuisoq

Jens-Frederik Nielsenip aamma RAL-ip akigititai, politikkeri naapertorlugu arlaleriarluni qaffaaffigineqarsimasut apeqqutigai. Naalakkersuisup ilisimatitsissutigaa, Naalakkersuisut akuersinerisigut RAL assartuinermi akigititaminik aatsaat qaffaasinnaasoq, oqaatigaluguli uuliamut aningaasallu nalinginut tapiliutigineqartartoq qaffassimasoq.

- Uuliap akiata, aningaasallu nalingata nunarsuatsinni nikerartarnerat Naalakkersuisut, Royal Arctic Line Ilu aqussinnaanngilaat, Mariane Paviasen allappoq, nangillunilu:

- Akigititat qaffannerinut apeqquteqartup ernumanerasuulli Naalakkersuisut ernumapput, siulianili eqqaaneqareersutut uuliap akianut, aningaasallu nalinginut Naalakkersuisut Royal Arctic Line lu sunniuteqanngillat.

Naalakkersuisup aamma RAL-ip umiarsuaatileqatigiiffittut Islandimiumik Eimskipimik suleqatigilersimasaanik assartueqateqartarnera illersorpaa. Assartueqatigiittarneq inuussutissarsiuteqartunut iluaqutaannginnerarlugu siusinnerusukkut isornartorsiorneqarsimavoq.

Tulliuttut ilanngullugit assartueqatigiittarneq sunniuteqarluassasoq Naalakkersuisut naatsorsuutigaat:

• Kalaallit Nunaanniit Kalaallit Nunaannullu sapaatip akunnikkaartumik ukioq kaajallallugu assartuisarneq, tamanna ukiut qulit kingulliit qiviassagaanni allannguingaatsiarneruvoq. Taamaalilluni ukioq kaajallallugu sikuneq ajortuni niuertarfiit, pisiniartarnerminni eqaallisaanissaannut annertuumik periarfissiivoq.

• Umiarsualivinnut umiarsualivinniillu arlalinnit (Aarhus, Helsingborg, Torshavn, Reykjavik) sapaatip akunnikkuutaartumik toqqaannartumik avammut tunisisarnissamik eqqussuisarnissamillu periarfissaqarneq. Sapaatip akunnikkuutaartumik assartuisoqartalerneratigut Skandinaviap, aammali Europap kiisalu USAp/Canadap assartueqatigisarnissaannut periarfissaqarnerulersitsivoq. Qanga assartueqatigiittarnerit tamangajammik Aalborgikkoortarsimanerisuunngitsoq.

• Reykjavik aqqusaarlugu Tasiilap angallavigineqalernerulernera kiisalu Kalaallit Nunaata Kitaata Tunullu akorngisa angallavigineqalernerulernerat.

• Nioqqutissat nillataartut naatitallu lslandimeersut sivikinnerusumik assartorneqartalernerat, nioqqutissallu qangatut timmissartukkoortillugit assartorneqarpallaarunnaarnerisigut avatangiisinut mianerinninnerulluni naatitanik assartuineq.

• Nunarsuarmioqataaleriartorneq, taamaalillunilu nunarsuatsinni assartuinermi attavittut ingerlatseqatigiiffimmik Kalaallit Nunaannillu ineriartortitsinissami aallaavigissaarneruneq. Tamanna avatangiisitigut ineriartortitsinissamut, 2 assartueqatigiittarnissamut, ilinniartitaanermut, inuutissarsiutinillu ineriartortitsinermut sunniutegassaaq.

Powered by Labrador CMS