Kisaq angalaqatigalugu
Takornarianik ingerlatseqatigiiffik Greenland Explorer umiarsuaaraq Kisaq aqqutigalugu angallassinernik imaanilu misigisassanik neqerooruteqarpoq. Coronap atuunnerata nalaani nunaqavissunik angalaqataanissamut isumassarsisitsisinnaasimapput.
Greenland Explorerimut tunuliaqutaapput Taatsiannguaq (Taatsi) Berthelsen, Klaus Iversen, Jan Seidsen aamma Mike Stewart, tamarmik takornarianik angallassinermik misilittagaqarluartut.
Greenland Explorerip umiarsuaaraq Kisaq pigisaraa. Taatsi Berthelsen, umiarsuaaqqap naalagaraa, Mike Stewartilu aquttuulluni.
– Ukiup qanoq ilinera periarfissallu pilersartut malittarivavugut. Aallaaniartitsinermik ingerlataqaqqammerpugut, tamatumunngalu atatillugu sapaatip-akunnerisa naanerini aallaaniartitsinerpassuarnik, nuannarineqarluarsimasunik, aaqqissuussisarsimalluta. Aqqutaani atortussat tamaasa isumagisarpavut. Ilaasut aallaaniarnissartik taamaallaat isiginiartussaavaat, Taatsi Berthelsen oqarpoq.
Siornatigut takornariat Kisami ilaasorineqartarsimagaluartut ullumikkut pingaartumik nunaqavissut angalanissanik inniminniisuusarput.
– Aaqqissuussinivut angalatitsinivullu soqutigineqarluarput. Inuit ilarpaalussuinit umiarsuaaraq tamakkerlugu inniminnerneqartarpoq. Sapaatip-akunnerisa marlussuit matuma siorna arnanik aqqaneq-marlunnik angallassivugut, aallaaniaqatigiittussanik. Ukioq manna aamma pisat amerlanersaannik pisaqarsimallutik aamma uterput: tuttut arfineq-pingasut, ukallit marluk aqisserlu ataaseq. Pikkorilluinnarput.
Ilanngussami Motoorimi atuarnerusinnaavutit, allaaserisanillu allanik atuarlutit. Atuagassiaq akeqanngitsumik uani atuarsinnaavat: