Kirsten Fenckeri illuatungiliuttut isornartorsiuinerannut akerliliivoq
Killilersuinernut nutaanut ataasinngormat atuutilersinneqartunut atatillugu, partiit siulittaasuisa peqataatinneqannginnerat pillugu illuatungiliuttut Naalakkersuisut isornartorsiorpaat. Tamannali Peqqissutsimut Naalakkersuisup Kirsten Fenckerip ilumuunnginnerarpaa
Naalakkersuisut corona pillugu pissutsinik innuttaasunut attaveqartarnerisa amigaataanerannik partiit arlallit isornartorsiuipput, aamma killilersuinernut nutaanut tunngatillugu partiit siulittaasuisa peqataatippiarneqannginnerat isornartorsiorlugu.
Kisianni isornartorsiuineq kingulleq Peqqissutsimut Naalakkersuisup Kirsten Fenckerip innersuussummik uppernarsaaserlugu ilumuunnginnerarpaa, taanna 19. november partiit siulittaasuisa ataatsimiinneranni tunniunneqarsimavoq, taassumalu oqarnera naapertorlugu tamarmik akueraat.
- Partiit siulittaasuilu nalinginnaasunik ataatsimiittarpugut, tassani killilersuinerit nutaat siunnersuutigisarpagut. Tassani tusarniaanermi suleqatigisarpagut. Siunnersuusiortarpugut, tassanilu 19. november saqqummiunneqarput, partiinilu siulittaasut tamarmik killilersuinernut nutaanut ataasinngormat uani sapaatip-akunnerani atulersinneqartunut akuersipput.
Paasitinneqartut imaluunniit peqataatinneqartut
Jens-Frederik Nielsenip, Erik Jensenip aamma Aqqalu Jeremiassenip attaveqartarnerup amigaataanera isornartorsiorpaat, killilersuinerillu atulersinneqarnerat pillugu oqarasuaatikkuinnaq paasitinneqarsimallutik isumaqarput, aalajangiinermi peqataatinneqarsimanatik. Kisianni oqarasuaatikkut attaviginninneq, siulittaasut 19. novemberimi siunnersuummut nammineq akuerisaannut malitseqartitsinerinnaavoq, Kirsten Fencker, Sermitsiaq.AG-mut oqarpoq.
- Sapaatip-akunnerata siuliani tamaasa immikkut sianerfigaakka, nuna tamakkerlugu killilersuinerit ataasinngorpamit atulersinneqarnissaat ilungersuutigalugu sulissutigigipput oqaluttuaralugu, tamarmillu ajunnginnerarpaat pisariaqartinnerarlugulu, taanna oqarpoq.
Erik Jensenip, Aqqalu Jeremiassenip aamma Jens-Frederik Nielsenip sapaatip-akunnerani kingullermi oqarasuaatikkut/sms-ikkut paasitinneqarsimanertik uppernarsarpaat, killilersuinernullu akuersaarsimallutik.
Killilersuinernut nutaanut peqataatitsinnginnermik illuatungiliuttut isornartorsiuinerannut tunngatillugu Kirsten Fencker ersarissumik oqaaseqarpoq.
- Sallusimanngikkunik, imaluunniit siunnersuut 19. november ataatsimiissutigisarput atuarsimanagulu paasisimanngilaat. Taamaanngippat allamik siunertaqarsimassapput, tamannalu akisussaaffeqannginnerusoq uggornartorlu isumaqarpunga, taanna oqarpoq.
Attaveqarnerup pitsaannginnera nassuerutigigaa
Akerlianik attaveqarnerup tamakkiisumik ingerlasimannginnera isertuutinngilaa.
- Soorunami attaveqarnitta pitsanngornissaa kissaatigaarput, tamannalu ilaatigut attaveqarnermut sulisut amerlinerisigut sulissutigaarput, Kirsten Fencker oqarpoq.
Naalakkersuisut attaveqartarnerisa amigaataanerat innuttaasut akornanni toqqissisimannginnermik paatsiveerusimaarnermillu pilersitsinerarlugit, partiit illuatungiliuttut isornartorsiuipput.
Kirsten Fenckerip ajornartorsiut nassuerutigaa, innuttaasullu nukillalaaqqanerat paasisinnaallugu. Maanna naalakkersuisut sinneri corona pillugu pissutsinut tunngatillugu ataatsimut attaveqartarnerup pitsaanerulernissaa anguniarlugu ataatsimeeqatigai.