Kirsten Fencker ineqarnermut suliaq pillugu: Isornartorsiut ilungersunartuuvoq
Inissaaleqisoqarnera malittarisassanik unioqqutitsinissamut utoqqatsissutissaanngilaq, taamatut isumaqarpoq Kirsten Fencker Kommuneqarfik Sermersuumi ineqarnermut atatillugu suliami akisussaasutut naalakkersuisuusoq. Nakkutilliisut isornartorsiutaat qanoq kinguneqartinneqassanersoq Naalakkersuisut aalajangissavaat.
Akisussaasutut naalakkersuisuusup ineqarneq pillugu suliaq ilungersunarluinnartutut isigivaa.
- Suliaq ilungersunarluinnartuusoq qanoq pisoqarnissaanik isummertinnata Naalakkersuisuni oqaloqatigiissutigeqqaassavarput, Peqqissutsimut Naalakkersuisoq Kirsten Fencker Sermitsiaq.AG-mut oqarpoq.
Naalakkersuisut nutaat apriilip qaammataani atuutilermata, Kommuneqarfik Sermersuumi ineqarnermut atatillugu suliaq nunamut namminermut naalakkersuisoqarfimmiit Peqqissutsimut Naalakkersuisoqarfimmut nuunneqarpoq. Tamatumunnga pissutaalluni, nunamut namminermut naalakkersuisunngorlaap Asii Chemnitz Narupip Kommuneqarfik Sermersuumi borgmesteriunerani suliap aallartinneqarsimanera.
Borgmestgeriusimasoq suliamut attuumassuteqarpallaarsimavoq, taamaammat nakkutilliisut suliaannut akisussaaffik naalakkersuisumut Kirsten Fenckerimut nuunneqarsimavoq.
Oqaatsit sakkortuut
Nakkutilliisut aalajangiussimavaat, kommunip inissianik namminersortunit attartoriarluni innuttaasunut attartortitseqqiisarsimanera inatsimmik unioqqutitsinerusoq.
- Isornartorsiuinerminni oqaatsit sakkortuut atorsimavaat. Kommunip inatsisinik atuuttunik mainnissimannginnera ajornartorsiutaavoq, Kirsten Fencker oqarpoq.
Pingaartumik innuttaasut naammagittaalliorfissaqannginnerat kiisalu kommunimik kommunillu ineqartitsiniarnermini iliuuserisimasai naalakkersuisup ernumanartututu isigai.
Borgmesterip Charlotte Ludvigsenip aalajangiussimallugu oqaatigaa, kommunimi inissaqartitsiniarnermik aaqqiissuteqarnissamut tamanna periarfissatuaasimasoq.
- Kommunimit tunngavilersuutigineqartut paasisinnaalluarpakka, inatsisinilli unioqqutitsinissamut utoqqatsissutissaanngillat, Kirsten Fencker erseqqissaavoq.
Naalakkersuisut aalajangiisussaasut
Periuserineqarsimasoq siunissami periarfissanngortinniarlugu inatsit misissorneqassanersoq Kirsten Fenckerip oqaaseqarfigerusunngilaa.
- Nakkutilliisut kaammattuutigisimasaat Naalakkersuisuni oqaluuserissavagut. Inatsit maanna atuuttoq aamma tassani pineqarpoq.
Kirsten Fenckerip oqaaseqarfigerusunngilaa, suliaq borgmesteriusimasumut maannalu borgmesteriusumut kiisalu kommunip ingerlatsivianut qanoq kinguneqartinneqassanersoq.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...