Kinguppanniut nutaaq rekordiliisoq
Ice Trawl Greenland A/S-ip kilisaat kinguppanniutaa Nataarnaq ukiumi aalisarfimmini siullermi aalisarluaqaaq.
- Aalisarnermik nakkutilliisoqarfimmit kisitsisit takutippaat Nataarneq pisaqarnerpaasimasoq. Taamaattoq kilisaat alla aalisarluarnerulaarsimasutut isikkoqarpoq. Nataarnarli maannamut ukiumi 9.000 tonsingajannik aalisarsimavoq, tamannalu nuannerluinnarpoq ingammik ukioq manna kilisaatip aalisaqqaarfigigaa eqqarsaatigalugu, Royal Greenlandimi kilisaatinut pisortaq Andrias Olsen uani sapaatit akunnerani ataasinngornermi oqarpoq, Sermitsiamit aperineqareerluni, Nataarnaq avataasiorluni kinguppannik kilisannermi allami qanoq inissisimanersoq.
Nataarnaq Ice Trawl Greenland A/S-imit pigineqarpoq, tassani siulersuisuni siulittaasoq Ove Rosing Olsen aalisarluarneq pillugu nuannaarluni.
Aviisi Sermitsiaq taama allappoq.
- Nalinginnaasumik kilisaatit nutaat aallartinnerliortarput, Nataarnarli taamaanngilaq, oqarpoq.
Sapaatit akunnerata naanerani 18-20. novembarimi Nuummi talittarfimmiittoq Sermitsiap kinguppanniut nutaaq takuniarpaa, aqumiut taarserniarlugit tassaniittoq peqqumaasersorlunilu pisaminik usingiaaniarluni, tassalu Sisimiuni aalisakkerivimmut kinguppaat puuniittut, kinguppaallu qaleruallit imaani uutat Kinamut tunineqartussat. Aamma pilersaarutaasutut motooria misissorneqassaaq.
Avataasiorluni aalisarnerup ineriartornerata aamma kinguneraa nutarterineq angallammiittullu tamarmik pitsaanerusumik sulinerannik. Suliat maskiinanik taarseriartornerisigut sulisut ikiliartuaarput, taarsiullugu suliaminni annertuumik immikkut piukkunnarsarsimallutik. Ukiut marlussuit matuma siornagut pisat 400-500 tonsiusarput. Kilisaatilli nutaat ima pitsaatigilersimaput kinguppannnik kilonik pisaqarnermi ikummatissamik atuineq annikillilluni, kilisaatip takuniarnerani kilisaatip naalagaa maskinchefilu oqaluttuarput.
Aviisimi Sermitsiami atuarnerusinnaavutit. Aviisi uani pissarsiariuk:
