Kinguppannik qaleralinnillu tunisaqarneq qaffariarpoq

Ukioq manna qaammatini pingasuni siullerni kinguppaat qalerallillu tunisat qaffariarput, saarullinnillu tunisineq siorna piffissamut tassunga sanilliullugu nikerianngilaq.

Qaleralinnik kinguppannillu tunisineq ingerlalluarpoq, Naatsorsueqqissaartarfimmit kisitsisit ullumikkut saqqummiunneqartut tamanna takutippaat.

Ukioq manna qaammatini pingasuni siullerni kinguppannik qaleralinnillu tunisineq siorna piffissamut tassunga sanilliullugit qaffariaateqarput.

Tassani kinguppaat 527 tonsinik aamma qalerallit 218 tonsinik amerlanerusut pineqarput. (Titartagaq ataani takuuk.)

Saarullinnik tunisineq piffissami tassani allannguuteqarpianngilaq. Tassani ukiumi qaammatini pingasuni siullerni siorna piffissamut tassunga sanilliullugu 23 tonsinik ikinnerusunik tunisisoqarpoq.

Maanna sinerissap qanittuani saarullinniarnermik aqutsineq biologit siunnersuinerannut aamma aalisarnermi ukiuni kingullerni pisarineqarsinnaasunut naleqqutinngitsut, Pinngortitaleriffimmi aalisakkanut qalerualinnullu immikkoortortaqarfimmi pisortaq, Helle Siegstad siornatigut oqaaseqarpoq.

2022-mi sinerissap qanittuanit saarullinnik 15.438 tonsinik tunisisoqarpoq, taakkulu 2016-mut sanilliullugu 19.184 tonsinik annikinnerupput.

Powered by Labrador CMS