Kinguaattoornerit akisusinnaasut
Covid-19 pissutigalugu sanaartornermi kinguaattoornernut sanatitsisut imaluunniit sanaartornermik ingerlatsisut aningaasaqarnikkut akisussaaffimmik tigumminnittuuppat? Kalaallit Nunaanni mittarfiliortiternissamik suliniut kinguaattooqqavoq, sanatitsisullu akiligassat Kalaallit Nunaanni innuttaasunut ingerlateqqinneqarsinnaanera maanna mianersoqqussutigaa.
Kalaallit Airports Holdning (Kair), Nuummi, Ilulissani Qaqortumilu mittarfinnik toqqaannartumik ingerlatseqatigiiffiillu pigisani Kalaallit Airports International aamma Kalaallit Airports Domestic aqqutigalugit sanaartortuusoq, piginnittuusoq ingerlatsisuusorlu, maajip 18-iani ataatsimeersuarpoq.
Aviisi Sermitsiaq taama allappoq.
Ataatsimeersuarnermi ilaatigut oqaatigineqarpoq Nuummi sanaartorneq pilersaarutaaqqaarsimasunut sanilliullugu qaammatinik pingasunik sisamanilluunniit kinguaattooqqasoq. Ilulissani sanaartornerup aallartinnissaa aamma kinguaattooqqavoq. Corona-virusimullu atatillugu killilersuinerit pilersinneqarsimasut sivisussusissaat apeqqutaatillugu Qaqortumi sanaartornerup aallartinnissaatut pilersaarutigineqartoq aamma kinguartinneqarsinnaavoq.
Immikkut aningaasartuutaasinnaasoq
Kinguaattoornerit sanaartornermi aningaasartuutit amerleriaateqarnerannik kinguneqarsinnaapput. Ilaatigut piffissap sanaartorfiusussap sivisunerulerneratigut, ilaatigut aningaasartuuteqarnerussutaasinnaasut, sanatitsisumut naggaterpiaatigut akiligassanngortinneqarsinnaasut, kingunerannik.
– Naggaterpiaatigut isumaqatigiissutinik nassuiaanermik apeqqut pineqassaaq, kisianni covid-19 pissutigalugu kinguaattoornerit sanatitsisumit akisussaaffigineqassappata, taava suliniutit sivisunerunerannut, tassa uagut sanaartornermillu ingerlatsisup sivisunerusumik sanaartorfimmiinnissaannut, akiliuteqartariaqalissaagut. Kisianni sanaartornermik ingerlatsisoq tamatumunnga akisussaatinneqassappat, sanaartornermik ingerlatsisoq suliniutip sivisunerussutaanut akiliuteqartussanngussaaq. Tamanna maannakkorpiaq aalajangiivigisinnaanngilarput. Maannakkorpiaq nunarsuaq tamakkerlugu sanaartornermik ingerlatsisut sanatitsisullu akornanni pissutsinut immikkut ittunut covid-19-ip pilersissimasaanut kikkut akisussaaffimmik tigumminnittuunerannut aaqqiagiinngissuterpassuarnik ingerlataqartoqarpoq. Tamatuma suliniummut immikkut aningaasartuutinik nassataqarsinnaanera eqqarsaatigalugu mianersoqqusivugut, KAIR-ip siulersuisuinut siulittaasoq, Johannus Egholm Hansen, oqarpoq.
Aviisimi Sermitsiami atuarnerusinnaavutit - aviisi uani pissarsiariuk: