Kinguaassiuutitigut innimiilliortarneq: Erik Jensen Siumut nuna tamakkerlugu ataatsimeersualerpat oqallitsitsiniartoq

Siumumi siulittaasunngorniarniarlutik nalunaarsimasut ilaasa ataatsip, Erik jensenip arnat partiip allaffeqarfiani kinguaassiuutitigut innimiilliorfigineqartarsimanermik oqaluttuartut tamakkiisumik tapersersorpai.

- Arnat taakku qulit nasaarfigaakka. Assorsuaq sapiipput, taamaammat sapinngisaq tamaat nersortariaqarput. Taakku saqqummiussinerisigut kinguaassiuutitigut innimiilliortarneq inuiaqatigiinni oqallisaalerpoq.

- Erseqqilluinnartumik killiliisoqassaaq

Partiimi siulittaasoq Kim Kielsen taamatut pisoqaqqittoqannginnissaa anguniarlugu qanoq suliniuteqarniarnermik oqaaseqarusuppallaanngitsoq, Erik Jensen isumaqarpoq pineqartoq partiimi piaarnerpaamik oqaluuserineqartariaqartoq.

- Siunissami kinguaassiutitigut innimiilliortoqartannginnissaa anguniarlugu qanoq suliniuteqaqqittoqassanersoq partiip katersuunissaa sioqqullugu oqaluuserisariaqarparput.

Erik Jensenip isumaa naapertorlugu, partii aasaq manna katersuuppat siulittaasussamillu qinersisoqartussanngorpat, kinguaassiuutitigut innimiilliortarneq ataatsimiigiartut oqaluuserinngitsoornavianngilaat.

- Nuna tamakkerlugu ataatsimiileruttaq kinguaassiuutitigut innimiilliortarneq oqaluuserisassanngortinniarpara. Erseqqilluinnartumik killiliisariaqarpugut. Tassungalu atatillugu isumaqarpunga, ileqqoreqqusatta allanngortinneqarnissaat pisariaqartoq, partiitsinni kinguaassiuutitigut innimiilliortarnerup akuersaarneqarsinnaannginnera erseqqissumik takuneqarsinnaaanngorlugu. Naleqartitatsinni aamma tamanna erseqqissaassutigineqartariaqarpoq.

- Siulittaasunngorniarniarputit. Arnat taakku qulit saqqummernerannut pissutaaqataavit?

Naamik. Taakku namminnerluinnaq iliuuseqarput. Matumani pissaaneqarniunneq pineqarani kinguaassiuutitigut innimiilliortarneq pineqarpoq.

Ilisimasaqannginnerartoq

Arnat taakku qulit nassuiaatigisimavaat, Siumut allaffeqarfianni kikkut tamarmik isigisut innimiilliortoqartartoq.

- Arnat susoqartarneranik oqaluttuarisaat ilisarisinnaavigit?

- Kinguaassiuutitigut innimiilliornermik sukkulluunniit takusaqarsimanngilanga. Takusaqarsimasuuguma akuliussimassangaluarpunga siulittaasumullu nalunaaruteqarlunga. Aamma ilimagilluinnarpara, partiimi ilaasortaqaterpassuakka taamatorluinnaq iliuuseqassasut.

- Arnat qulit taakku oqaluttuarput, angutit allat innimiilliornernut arlalitsigut isiginnaartartut. Qinikkat aamma nikanarsaasutut pissusilersortarnerannik ilisimatinneqarsimavugut. Qanoq ilillutit tamakku takunngitsoorsimasinnaavigit?

- Naalakkersuisuungama illumi illuatungaaniittumi inissisimasimavunga. Taamaammat ilisimanngisannik pisoqarsimaratarsinnaavoq. Qulakkeerluguli oqarfigisinnaavakkit, taamak iliortumik takunnissimasuuguma akuliussimassangaluarama.

- Tassa pasitsaassimasaqanngiivippit? Isiginngitsuusaaravit?

Soorlu oqaatigereeringa illumi allami allaffeqarsimavunga. Maannali partiip allaffeqarfianiittarama, taamak iliortumik takusuunguma oqaaseqassangaluarpunga siulittaasutsinnullu nalunaarutigalugu.