Kinguaassiuutitigut innimiilliorneq: Ilisimatinneqarpunga, naameruuma malersulissagaanga
Kornelia Benjaminsenip oqaluttuaraa, Siumut Inuusuttaanni suliffeqarfinnilu assigiinngitsuni kinguaassiuutitigut innimiilliorfigineqartarsimalluni. Oqarfigineqarsimavoq arnat inuusuttut kusanartut innimiilliorfigineqartarnertik akuerisariaqaraat
Kornelia Benjaminsen filmi piviusulersaarut 'Pilluarneq Ersigiunnaarpara' aqqqutigalugu saqqummerpoq oqaluttuaralugulu meeraalluni kinguaassiuutitigut innarlerneqarsimanini.
Maanna Sermitsiaq.AG-mut oqaluttuaraa, tamatuma kingorna suliffeqarfinni polikkerinillu kinguaassiuutitigut akulikitsumik innimiilliorfiginqartarsimalluni aamma killissaq qaangerlugu pissusilersorfigineqartarsimalluni.
- Misigisimanarpoq kinguaassiuutitigut innimiilliortarneq inuiaqatigiit akornanni nalinginnaalluinartoq. Tamanna kukkulluinnartuuvoq inatsisinillu unioqqutitsisartut pimoorunneqarnerusariaqarput, taanna oqarpoq.
Siumut Inuusuttaanni kinguaassiuutitigut innimiilliorfigineqartarneq
2015-imi 20-nik ukioqalurni inuusuttut inatsisartuinut peqataasimavoq, kinguneratigulu Siumut Inuusuttaanni pikkorissarsimalluni. Partiimut aalajangersimasumut attuumassuteqarusussimanngikkaluarpoq, oqaaseriumasanili tusartikkusussimavai. Aaqqissuussap ataatsip ingerlanneqarnerani angut qaninnialersimavoq kannguttaatsuliulerlunilu.
- Oqarfigaanga: 'Ilittut ukioqartuuguma piniarsarissagaluarpagit'. Taamanikkut ittuutoorujuusimavunga, taamaammat oqarfigerusukkaluarlugu oqarsinnaasimanngilanga, Kornelia, arnarpassuit allat kinguaassiuutitigut innimiilliorfigineqarsimasut oqaluttuaat assigalugit qisuariaatigisimasani pillugu oqaluttuarpoq.
Misigisimanarpoq kinguaassiuutitigut innimiilliortarneq inuiaqatigiit akornanni nalinginnaalluinartoq.
Kornelia Benjaminsen oqaluttuarpoq, oqarfigineqarsimalluni angutit naalagaammata qanoq pineqartanini akueriinnassagaa.
- Arlaleriarlunga oqarfigineqartarpunga, 'naameerukku asuli malersuinnalissavaatit angernissavillu tungaanut malersorlutit'.
Tamatuma kingunitsiannguiatigut Siumut Inuusuttaani aneqqissimavoq.
Oqarfigineqarsimavoq arnat inuusuttut kusanartullu innimiilliorfigineqartarnertik akuerisariaqaraat.
Suisarnerminili aamma kinguaassiuutitigut innimiilliorfigineqartarsimavoq, tarmigiut annersinneqartarsimavoq aamma inuusuttunnguullunili pimmatigineqartarsimavoq. 15-inik ukioqarluni sulisarnermini kinguaassiuutitigut innimiilliorfigineqartarsimavoq.
- Pisortap sulisulluunniit sinniisaata tamanna pimoorussimanngilaat, allaanngilaq taamatut pissusilersortarneq nalinginnaasumik akuerisaasoq.
Kornelia Benjaminsenip oqaluttuaraa, suliffeqarfinni allani, aamma pisortat suliffeqarfiutaanni taamasut misigisaqartarsimalluni, tassa kinguaassiuutitigut innimiilliorneq pimoorullugu tiguneqartarsimannginnera misigisarsimavaa. Ilinniartut ineqarfianni, 16-inik ukioqarluni najugaqarfigisimasaani aamma tamanna atuuppoq.
- Ilinniartut ineqarfianni pisortamut tamanna oqaatigingakku oqarfigineqarpunga, arnaagama inuusuttoq kusanartorlu pimmatigineqartarnera kinguaassiuutitigullu innimiilliorfigineqartarnera akueriinnartariaqaringa.
.