Kinguaassiuutitigut innarliisimasutut eqqartuunneqartoq: - Katsorsarneqarusuppunga
Angut 25-nik ukiulik Nunatta Eqqartuussisuuneqarfianit meeqqanik kinguaassiuutitigut sualuttumik innarliisimasutut qanittukkut pisuutinneqarpoq ukiunilu sisamani pineqaatissinneqarsimasunut inissiisarfimmiittussanngortitaalluni. Eqqartuussivimmi allanngorusunnini ersersippaa.
- Ugguarpunga taamaaliorsimagama. Peqqusiileqinarsimavoq, kisianni qaangerusuppara. Utoqqatserusuppunga neriuppungalu assingusunik iliuuseqaqqinngisaannassallunga.
Taama angut 25-nik ukiulik, Tasiilamit Nunatta Eqqartuussisuuneqarfiani suliareqqitassanngortitsinermi ilungersunartumi eqqartuussutip oqaatigineqarnissaa sioqqullugu oqaaseqarnissamut periarfissinneqarami, oqarpoq.
Aviisi AG taama allappoq.
Angut inuusukannersoq tuattoq eqqartuussivimmi kinaassutsimut ilisarnaataavallanngitsunik atisaqarpoq, qaqortumik tujuuluaraqarluni, qernertunik qarleqarluni sneakersinik skooqarluni nutsanilu Tuluit Nunaanni Europamilu arsaattartut akornanni periaaserineqartutut inississimallugit. Qatanngutigiinni tallimaasuni nukarliup tulleraa meeqqallu atuarfiata saniatigut ilinniagaqarsimanani. Peroriartornermini Tasiilamilu angajoqqaani, qatanngutini, soralussani nukappiaqqat niviarsiaqqullu arlallit najugaqatigisimavai.
Angut juulimi 2019-imiit ukiuni marlungajanni tigummigallagaasimavoq. Piffissap ingerlanerani tarnikkut eqqarsartaatsikkullu misissugarineqarsimavoq, pisartuni ilungersunartuni tamani soorlu toqutsinerni kinguaassiuutitigullu pinerluutinik suliani tamani periaaserineqartutut.
Eqqartuussivimmi suliap ingerlanneqarnerani ulluni marlunni qallunaatuinnaanerusoq ingerlanneqartumi, unnerluutigineqartoq tusarnaarutilerluni malinnaaqqissaarsimavoq, assersuutigalugu oqalutsip eqqarsartaatsikkut qanoq issusianik nalilersuinerit tarnip nakorsaanit, tarnip pissusianik immikkut ilisimasalimmit aamma Retslægerådimit suliarineqarsimasut imaluunniti angutip nammineq eqqartuussisoqarfimmi nassuiaatigisimasai atuaraangagit.
Tassani angut februaarimi pissutsini katillugit tallimani pisuutinneqarpoq piffissami killiligaanngitsumik parnaarussassanngortitaalluni, ilaatigut kinguaassiuutitigut innarliinernut aamma meeqqanik pornolianik pigisaqarsimasutut.
Aviisimi AG-mi atuarnerusinnaavutit. Aviisi uani pissarsiariuk: