meeqqat inuusuttullu

Kinguaassiuutitigut atornerluinerup pitsaanerusumik pinaveersaartinnissaa ujartorpaa

Meeqqanik kinguaassiuutitigut atornerluinermik paasissutissiineq inuit nettimi naapittarfiisigut siammarsarneqartariaqarpoq, taamatut isumaqarpoq Tillie Martinussen Demokraatineersoq

Meeqqat kinguaassiuutitigut atornerlunneqartarnerannik pinaveersaartitsineq pitsaanerusoq Demokraatineersup Tillie Martinussenip ujartorpaa

Meeqqanik kinguaassiuutitigut atornerluineq innuttaasunik annertuumik paasisitsiniaaneq aallartinneqartariaqarpoq, tamatumani suliniutit arlallit aallartinneqareersimagaluartut meeqqanik kinguaassiuutitigut atornerluineq suli annertuvallaaqimmat.

Taamatut isumaqarpoq Inatsisartunut ilaasortaq Demokraatineersoq Tillie Martinussen.

Taassuma tikkuarpaa innuttaasunik paasisitsiniaaneq innuttaasunut tamanut naammattumik anngunneqarneq ajortoq.

Nettimi inuit naapittarfii atorlugit

– Paasisitsiniaanermik suliniut tamanna nettimi inuit naapittarfiisigut siammarsartariaqarpoq, nunaqarfinnut illoqarfinnullu, ilanngullugulu ikiorneqarnissamik pisariaqartitsisoqarpat ersarissumik allallugu telefonit normuinut sunut saaffiginnittoqarsinnaanersoq, Tillie Martinussen erseqqissaavoq.

Tamanna peqatigalugu isumaqarpoq paasisitsiniaanermi ilanngunneqartariaqartoq ajortuliornerit sumut nalunaarutigineqartassasut, qanorlu isilluni meeqqat kinguaassiuutitigut atornerlunneqarsimasut oqaloqatigineqartassanersut, kiisalu taama ajortigisumik pineqarsimanerisa paasineqarnerata kingorna suut pisariaqartinneraat qulaajartarlugu.

Politikkikkut piareersarneq

– Inuiaqatigiinnut pingaaruteqarpoq, meeqqamullu kinguaassiuutitigut atornerlunneqarsimasumut aalajangiisuusinnaallunilu politikkikkut atornerluinernik sunilluunniit pitsaaliuinermik suliniuteqarnitta attatiinnarnissaa, pingaartumik meeqqanik inuusuttunillu - taamaasillutalu ersarissumik nalunaajaatigalugu meeqqanik kinguaassiuutitigut atornerluineq akuerinnaanngikkipput, taanna tusagassiorfinnut nalunaarutikkut allappoq.

Tillie Martinsenip kissaatigaa nuna tamakkerlugu kinguaassiuutitigut atornerlunneqarsimasut ikiorserneqarnissaannik ullumikkut suliniutit nuna tamakkerlugu saqqummiunneqassasut.

- Nunatsinni meeqqanik inuusuttunillu kinguaassiuutitigut atornerluineq kinguaariit makkua atuunneranni unitsinniartariaqarparput, Tillie Martinsen oqarpoq.

Powered by Labrador CMS