Kinguaassiutitigut pinerliisimasut pillugit inatsit sukaterneqalersoq

Kalaallit Nunaanni pinerluttulerinermi inatsimmi kinguaassiutitigut kannguttaatsuliorsimaneq pillugu tunngasortalik arlalitsigut nutarterneqassaaq. Inatsisinik atuutsitsinermut ministerip Søren Pape Poulsenip siunnersuutaa ullumi siullermeerneqarmat, Folketingimi amerlanerussuteqartut tapersiipput.

Danskit pillaasarnermut inatsisaanni pineqartut 2009-mi 2013-imilu nutarterneqareerput. Kalaallit Nunaanni Eqqartuussiveqarfiup danskit inatsimmik sukaterisimanerat malissagaat innersuussutigineqarpoq. Innersuussut taanna Inatsisartunit Naalakkersuisunillu taperserneqareerpoq.

- Kalaallit Nunaat kinguaassiutitigut pinerlunneq eqqarsaatigalugu unammilligassarpassuaqarpoq, Kalaallit Nunaannilu inatsisilerineq arlalitsigut nutartertariaqarluni, taamaaliornikkut pineqaatissiissutit iluaqutaanerulersinneqassallutik, SF-ip kalaallit nunaat pillugu oqaaseqartartua, Karsten Hønge, oqarpoq.

Pinngitsaaliineq pillugu paragraffi sukaterneqassaaq

Inatsit ima sukaterneqassaaq:

• Ilaquttanik qanigisanik pinngitsaaliinermi inatsimmi meeravissiat ilaatinneqalissapput.
• Katisimasutut aappariinnermi kinnguaassiutitigut pinngitsaaliinerit katisimanngitsutut kinguaassiutitigut pinngitsaaliinertut pineqaatissiissutaasalissapput.
• Meeqqanik aqqanillit ataallugit ukiulinnik kinguaassiutitigut kannguttaatsuliornerit ingerlaannartumik pinngitsaaliinertut pineqaatissiissutigineqartalissapput. Taama kannguttaatsuliorneq siornatigulli inatsimmik unioqqutitsineruvoq.
• Meeqqanik inuttalersukkanik pornoteqarneq pornoliornerluunniit pinerlunnertut taaneqartalissapput. Pissutsit ullumikkut atuuttut imaapput, computerimiititaqarneq aatsaat pineqaatissiissutaasarluni.
• Inuup tarnimigut nappaataa eqqarsartaatsikkulluunniit kinguarsimanera iluaqutsiullugu atoqateqarniarneq pineqaatissiissutaasalissaaq.
• Inuk pinaasersinnaanngitsoq kinguaassiutitigut atoqatiginiaraanni pinngitsaaliinertut pineqaatissiisoqartalissaaq.

Naalakkersuinikkut oqariartuut sakkortooq

Kalaallit Folketingimut ilaasortaatitaasa marluullutik nuannaarutigaat kinguaassiutitigut pinerliisarneq pillugu inatsisit sukaterneqartussanngormata.

- Inatsisinik sukaterinerup takutippaa kalaallit inuiaqatigiit akornanni meeqqanut inersimasunullu kinguaassiutitigut kannguttaatsuliornerit naalakkersuinikkut akuerineqanngitsut, Aaja Chemnitz Larsen (IA) oqarpoq.

Sukaterinerit pillugit Aleqa Hammond (NQ) isumaqataalluni nalunaarpoq. Minnerunngitsumik eqqarsaatigalugu Kalaallit Nunaanni Danmarkimut sanilliullugu arfineq-pingasoriaammik kinguaassiutitigut kannguttaatsuliortunik nalunaarutiginnittoqarnerusarmat.

- Kalaallit Nunaanni kinguaassiutitigut kannguttaatsuliortarneq ajornartorsiutaasorujussuusoq nassuerutigisariaqarparput, oqarpoq.

- Kinguaassiutitigut kannguttaatsuliornerit inummut, ilaqutariinnut inuiaqatigiinnullu kingunerluuterpassuaqartarput. Akisussaaffik tigusariaqarparput. Oqartussaasuugutta, kommuniugutta innuttaasuuguttaluunniit, allannguinissamut tamatta pingaaruteqarpugut.

Aleqa Hammondip (NQ) inatsisissatut siunnersuut Naalakkersuisut kinguaassiutitigut kannguttaatsuliornerup unitsinneqarnissaannut suliniutaanut Killiliisamut attuumatippaa, siunnersuullu suliniutip siunertaanut tulluarnerarlugu.

Inatsisinut atuutsitsinermut ministerip Søren Pape Poulsenip (K) nuannaarutigaa siunnersuut Folketingimi Kalaallit Nunaannilu taperserneqarluarmat.

- Nuummi Nakskovimiluunniit kinguaassiutitigut kannguttaatsuliortoqarpat, iliuuseq kusananngilluinnartuuvoq, kannguttaatsuliorfigineqartorlu inuunermi sinnerani qileroqalersarpoq, naggataarutaasumik oqaaseqarnermini taama oqarpoq.

Inatsisissatut siunnersuut kalaallit nunaat pillugu ataatsimiititaliami suliarineqartussanngorpoq.