Kinguaassiutitigut kannguttaatsuliortarnerit: Maligassiuisut allannguipput

Naalakkersuisut kinguaassiutitigut kannguttaatsuliortarnerup akiorneqarnissaannut suliniutaanni Killiliisami, maligassiuisut arfinillit pingaaruteqarluinnarput. Killiliisallu suliap saqqummiunneqarneraniit qaammatit sisamat qaangiutiinnartut allannguisimasut malunnarsereerpoq.

- Isumaginninnermut aqutsisoqarfiup Killiliisami maligassiuisunik peqataateqarnera pitsaasumik kinguneqalereerpoq, isumaqarpugullu kinguaassiutitigut kannguttaatsuliorfigineqarsimanerup ammanerusumik oqaluuserineqarnissaanut pitsaasunillu suliami angusaqarnissamut maligassiuisut pingaaruteqarluinnartut, Isumaginninnermut aqutsisoqarfik tusagassiutinut nalunaaruteqarluni allappoq.

Isumaginninnermut aqutsisoqarfik maligassiuisunik suleqatigiinnissamut novembarip 28-ani 29-anilu siullermeerluni naapisitsivoq. Maligassiuisut tallimaasut – Gukki Nuka, Henrik, Arnajaraq, Arnánguak aamma Michael – tamarmik meeraanerminni kinguaassiutitigut kannguttaatsuliorfigitissimapput, maligassiuisorlu kingulleq – Heidi – kinguaassiutitigut kannguttaatsuliorfigitissimasunik marlunnik paneqarluni.

Maligassiuisut naapinnerminni oqariartuutip anninnissaanut nukittuffitik qanoq atorsinnaanerlugit oqaluuserivaat.

- Pingaaruteqarporli maligassiuisutut sassartut aamma paarineqarnissaat, nukillaannginniassammata. Taamaammat alloriarneq tulliussaaq maligassiuisut pikkorissartinneqarnissaat oqaloqatigiinnissamullu sakkussanik ilinniartinneqarnissaat.

Taassuma saniatigut kinguaassiutitigut kannguttaatsuliortarnerup akiorneqarnissaanut atatillugu maligassiuisut suleqataanissaat pilersitseqataanissaallu anguniarlugu, pinarsuartumik sulisinnaasut pilersinneqassapput, tusagassiutinut nalunaarummi ilanngullugu allassimavoq.

Pinasuartumik sulisinnaasut maligassiuisut tarnip pissusaanik immikkut ilisimasalimmik oqaloqateqarsinnaanerannik ilaatigut periarfissaqartitsipput.