Kinguaassiutitigut kannguttaatsuliortarnerit akiorniarlugit timersoqatigiiffiit suleqatigiilerput
Timersoqatigiiffiik kattuffiisa tamakkerlutik suliniut Killiliisa taperserpaat
Kalaallit Nunaanni Timersoqatigiiffiit Kattuffiata ataaniittut, timersoqatigiiffiit kattuffii qulingiluaasut kinguaassiutitigut kannguttaatsuliortarneq pillugu akiuiniarnermut peqataalerput.
Sinniisutut aallartitat tallimanngormat ataatsimiimmata suliniut Killiliisa oqaluuserisassani ilaatinneqarpoq, tassungalu tunngasumik oqallilluartoqarluni. Toqqissisimanartumik pitsaasumillu ingerlatsinissaq timersornerup sunneeqataaffigissagaa oqallinnermi isumaqataaffigineqarluarpoq.
- Tiinganiarluni qaninngoorneq atornerluinerlu akuersaarneqanngilluinnarnerat kikkut tamarmik paasissagaat Kalaallit Nunaanni Timersoqatigiit Kattuffiat aammalu kattuffiit tamarmik isumaqatigiissutigaat, Kalaallit Nunaanni Timersoqatigiiffiit Kattuffiat tusagassiutinut nalunaarummini allappoq.
- Kattuffiit tamarmik sammisamut tunngatillugu oqallinnermi peqataalluarput sammisallu timersornermi ilanngunneqarnera nuannaarutigalugu.
- Malittarisassanik ilitsersuutinillu timersorfiusuni tamani atuutsitsilernissamut suliassaqarfiuvoq.
Isikkamik arsartartut, assammik arsaattartut, sulorartartut, volleyballertartut, arctic sportimik ingerlataqartut, ujakkaartartut, taekwon-dortartut, nerrivimmi arsaarartartut qajartortartullu kattuffii katillugit qulingiluaasut Kalaallit Nunaanni Timersoqatigiiffiit Kattuffiata ataaniipput.