Kinguaassiutitigut kannguttaatsuliorfigineqareernerup kingorna: Ilerrata eqqaani allakkamik atuaaniarpunga
Eqqumiitsuliortup Gukki Nukap eqqumiitsuliani "Revner i Sjælen / Tarnip Qupineri" Uummannami saqqummersissavai. Inuusuttuunerminili illoqarfik qimakkamiuk, aatsaat tikeqqilerpaa.
Gukki Nuka ukiut marluk matuma siorna eqqumiitsuliani “Tarnip Qupineri” saqqummersillugit, 14-inik ukioqarluni pinngitsaalisaasimanini pillugu oqaluttuarpoq.
Tamassuma kingorna Danmarkimi Kalaallit Nunaannilu tusagassiutit aqqutigalugit kiisalu nammineq oqalugiartarnermini kinguaassiutitigut kannguttaatsuliorfigineqarsimanini oqaluttuarisarpaa. Upernaaq inatsisartunut qineqqusaartoqarmat oqallinnermi peqataavoq, tassanilu qineqqusaartut imminnut assammillutik neriorsoqatigiipput kinguaassiutitigut kannguttaatsuliortarnerup unitsinnissaannut iliuusissanik pimoorussillutik sulissuteqassallutik. Piffissamili sivitsortumi nukissaaleqisimavoq.
- Aalajangerama piffissami sivisulaami saqquminiarnanga, Sermitsiaq.AG-mut oqaluttuarpoq.
Timersoqatigiit kattuffiannit suliniutit nuannaarutineqarput
Killiliisami maanna maligassiuisuni arfiniliusuni peqataavoq, kinguaassiutitigullu kannguttaatsuliortarnerit peerutivinnissaannut suliniaqataanissamut piareersimalluni.
- Qaammatini pingasuni sisamaniluunniit nukissannik katersereerlunga maanna piareersimalluinnarpunga. Ullumikkut nukissaqarneruvunga misilittagaqarnerullungalu, qanorlu inissisimaninnik ilisimaarinninnerullunga.
Suliamut atatillugu nuannaarutiginerpaasaata ilagaat timersoqatigiiffiit GIF-ip ataaniittut tamakkerlutik kinguaassiutitigut kannguttaatsuliortarnerup unitsinniarnissaannut ataatsimoorlutik iliuuseqassallutik suleqatigiinniarmata.
- Uummatikkut eqqorluinnarpaannga, Gukki Nuka oqaluttuarpoq.
Timersoqatigiiffiit akuliunnerat pingaaruteqartippaa, tassami Uummannami najugaqartilluni 14-inik ukioqarluni, arsaannermik sungiusaasuata kinguaassiutitigut sakkortuumik kannguttaatsuliorfigaa. Tamanna pitinnagu sungiusaasup ukiuni arlalinni tarnikkut kannguttaatsuliorfigisareersimavaa.
Uummannaq tikeqqilerpaa
Kinguaassiutitigut kannguttaatsuliorfigineqarsimanerup kingunerisaanik piffissami sivisuumi Kalaallit Nunaannukarsinanasimanngilaq. Uummannaq 1983-imili kingullermik takuaa. Inunngorfinili upernaaru tikeqqittussanngorpaa. Tikinnissaanut pissutaavoq “Tarnip Qupineri” saqqummersissagamigit. Eqqumiitsuliani Nuummi saqqummersinneqarmatali neriuutigiuarsimavaa aamma Uummannami saqqummersinneqarumaartut.
- Soorunami immikkut isumaqarluinnarpoq saqqummersitsineq taavunga apuunneqartussanngortoq. Taamaattoqalerpat oqareerpunga assit nammineerlunga nivinngartussallugit.
Saqqummersitami saniatigut Uummannami saqqummersitsinissamut pigititaminik immikkut eqqumiitsuliamik nutaamik Gukki Nuka saqqummersitsissaaq.
Katsorsarnermi alloriarneq kingulleq
Angalanerli allamik aamma siunertaqarpoq. Kinguaassiutitigut kannguttaatsuliortuusimasoq maanna toqoreerpoq, taassumalu ilerra ujarniarpaa.
- Ukiut arlallit matuma siorna allakkamik takisuumik allaffigaara, taannalu ilerrata saavani atuassavara.
- Tassunga tunngatillugu Kalaallit Nunaannullu tunngatillugu katsorsarninni alloriarnerit kingullersaattut taamaaliornissara isigaara.
Uummannamut tikeraarneq Killiliisamit piviusulersaarummik filmiliortunit malinnaavigineqassaaq. Immiussisussat ilerfiarnermut peqataasinnaasut akuerineqarsimavoq – ataatsimilli piumasaqaatitaqarpoq, immiussineq nipimik immiussinertaqassanngilaq.
- Oqaatigiumasakka uanga taassumallu kisimik akornanniissapput, Gukki Nuka naggasiivoq.