Kinguaassiutitigut innarliisut pineqaatissinneqartarnerannik sukaterinissamut isumaqatigiittoqartoq

Kalaallit Nunaanni pinerluttulerinermi inatsimmi kinguaassiutitigut innerliisut pillugit sukaterisoqarnissaannut siunnersuummut Folketingimi isumaqatigiissutigineqarpoq.

Siunnersuut ullumi aappassaaneerneqarluni ataatsimiissutigineqarmat Kalaallit Nunaannut ataatsimiititaliamut suliassanngortinnagu ingerlaannartumik pingajussaaneerneqarnissaanut ingerlateqqinneqarpoq.

Inatsimmi uku sukateriffiginiarneqarput:

• Ilaquttanik qanigilluakkanik kinguaassiutitigut atornerluinerit eqqartorneqartillugit meeravissiarineqalersimasut aamma ilanngunneqartalissapput.
• Katisimasut akornanni kinguaassiutitigut atornerluinerit kinguaassiutitigut atornerluinertut allatuulli katisimanngitsut akornanni pisimasutulli pineqaatissiissutigineqartalissaaq.
• Meeqqanut aqqaneq-marluk ataallugit ukiulinnut kinguaassiutitigut kannguttaatsuliornerit kinguaassiutitigut pinngitsaaliilluni atornerluinertut pineqaatissiissutigineqartalissapput. Kannguttaatsuliornerit taama ittut inatsimmik unioqqutitsisutut taaneqartareerput.
• Pornonik meeqqanik inuttalerneqarsimasunik nittartakkakkut isiginnaarneq pineqaatissiissutaasalissaaq. Inatsi maanna atuuttoq malillugu qarasaasiamiittuutitaqarneq kisimi ullumikkut pineqaatissiissutaasarpoq.
• Inunnik tarnimigut ineriartornermigulluunniit innarluutilik uukapaasiaralugu atoqateqartarneq pineqaatissiissutaasalissaaq.
• Inuk pinaaseriarsinnaanngitsoq atoqatigigaanni tamanna pinngitsaaliilluni atornerluinertut pineqaatissiissutigineqartalissaaq.

Siunnersuut pilersaarutit malillugit februaarip 21-ani akuersissutigineqassaaq.