Katersuiniarneq
Kinguaassiutitigut atornerluisarnerup akiorneqarnissaanut 1,65 mio koruunit katersorneqarput
Ippassaq nuna tamakkerlugu katersuiniarnermi suliffeqarfiit inuiaqatigiillu tunisillualaalivipput. Naakusap meeqqanut kinguaassiutitigut atornerluisarnerup akiorniarneranut atatillugu katillugit 1,65 mio koruunit katersorneqarput.
1.655.000 mio koruunit tassaapput ippassaq nuna tamakkerlugu meeqqat kinguaassiutitigut atornerlugaasimasunut katersaarineqarsimasut.
Agguaqatigiisikkaanni Kalaallit tamarmik 29 koruuninik tunniussaqarsimapput. Danmarkimi katersuiniarnermi agguaqatigiisillugu danskit 16 koruunit missarluinnaani tunniussaqarsimapput.
Ukioq manna katersuiniarneq tv-kkut aallakaatinneqartoq Nakuusamit aaqqissuunneqarpoq.
Nakuusap Kalaallit Nunaanni Namminersornerullutik Oqartussat Unicef Danmarkilu suleqatigisarpaat. Aningaasat katersorneqartut Nakuusap meeqqanut kinguaassiutitigut atornerluisarneq akiorniarlugu suliniutaanut atorneqassapput.
Meeqqat kinguaassiutitigut atornerlunneqarsimasut suut ersiutaasarnerannik inersimasunut paasititsiniaanermi suullu sillimaffigineqarsinnaanerannut aningaasat atorneqassapput.
Angusat Unicefip Danmarkimi generalsekretæriata, Steen M. Andersenip nuannaarutigaa.
- Tapersersuisoqarluarnera aningaasarpassuillu katersorneqarsimanerat qujamasuutigaarput.
- Kalaallit Nunaanni kinguaassiutitigut atornerluisarneq inuup inuuneranik sequtserisartoq maanna sukumiinerusumik suliniarfigineqalernissaa neriulersitsisoq oqaatigaa.