Kinguaassiutitigut atornerluisarneq akiorniarlugu futsalerluni unamminerit

Kalaallit Arsaattartut Kattuffiat futsalimi takutitsilluni arsaannernik, ullumi sapaammi aaqqissuussivoq, tassani kinguaassiutitigut atornerluinerit akiorneqarnerat ukkatarineqassaaq.

Naalakkersuisut kinguaassiutitigut atornerluineq akiorniarlugu periusissiaat 2018-2022 Killiliisa saqqummermalli kattuffiit assigiinngitsut kinguaassiutitigut atornerluinerit ikilisikkiartortinnissaat pillugu suliniutinut peqataarusullutik assut soqutiginnissimapput. Namminersorlutik Oqartussat tusagassiuutinut nalunaarummi taama ilisimatitsipput.

”Killiliisa Cup”-imut programmi:

Sapaat 11. november 2018

  • Nal: 17:30 B-67 unammissavaat NûK (U17) Niviarsiaqqat
  • Nal. 19:00 Kultureqarnermut Naalakkersuisoq, Ane Lone Bagger oqalugiassaaq
  • Nal. 19:00 Nunanut allanut unammisartut A unammissavaat Nunanut allanut unammisartut U19

Arfininngorneq 17. november 2018

  • Nal. 13:30 B-67 unammissavaat GSS (U15) Nukappiaqqat
  • Nal. 15:30 Nunanut allanut unammisartut A unammissavaat Holdit Nuummeersut

- Tassunga atatillugu Kalaallit Arsaattartut Kattuffiat (KAK) Isumaginninnermut Aqutsisoqarfimmut saaffiginnissimapput timersornermi kinguaassiutitigut atornerluisoqartannginnissaa siunertaralugu killiliisarnermut suleqataarusullutik. Tamanna tunngavigalugu ”Killiliisa Cup”-ip aaqqissuunneqarsimavoq, Namminersorlutik Oqartussat allapput.

Siunissami Isumaginninnermut Aqutsisoqarfimmit KAK-imi sungiusaasut kinguaassiutitigut atornerluisoqarsimanermik pasitsaassisoqarnermi pitsaanerusumik iliuuseqarsinnaassusaat anguniarlugu ilinniartitsillutik tapersersuerusupput.

- Kinguaassiutitigut atornerluinermut sorsuuteqarneq sorsuutaavoq ataatsimoorussaq, KAK-illu ”Killiliisa Cup” aqqutigalugu kinguaassiutitigut atornerluinermut atatillugu paquminartuujunnaarsaanermut suleqataavoq aamma sammisaq pillugu ammanerusumik oqaloqatigiittoqartalernissaanut aqqutissiuilluni, Namminersorlutik Oqartussat tamanna oqaatigaat.

Nuummi Illorsuaq Timersortarfimmi sapaat 11. november aamma arfininngorneq 17. november 208-imi ”Killiliisa Cup” ingerlanneqassaaq.

Powered by Labrador CMS