Kinguaassiutitigut atornerluinerit: Ammarluni misigisaq iluarpoq

Kenneth Bjørn Andersenip inuunermini eqqaamasaa siullerpaaq tassaavoq, kinguaassiutitigut kanngutsaatsuliorfigineqarneq. Allat ikiornissaat neriuutigalugu maanna saqqummerpoq.

Kenneth Bjørn Andersen sapaatip-akunnerani kingullermi Facebookimi saqqummerluni mikisunnguulluni kinguaassiutitigut atonerlugaasimanini oqaluttuariniarlugu aalajangerpoq.

- Inuit ammarnissaat neriuutigalugu taamaaliorpunga, taamatut atornerlugaasimasut amerlasuut arlaannaanulluunniit oqaatigisinnaanngikkaat nalunnginnakku, Kenneth Bjørn Andersen, Sermitsiaq.AG-mut oqarpoq.

Kennethip nammineerluni ukiorpaalussuarni atornerlugaasimanini ikinngutiminut ilaquttaminullu ammasumik oqaluuserisareerpaa. Marsip arfineq-pingajuanni Facebookimut ilaatigut ima allakkami ‘Ataatsimut isigalugu ajunngilanga, kisianni nakkarfigisartagara itivoq’, namminerminut taama annertutigisumik sunniuteqarnissaa naatsorsuutigisimanngikkaluarpaa.

- Facebookikkut saqqummiukkakku ilimagisannik uannut annerusumik sunniuteqarpoq. Tamarmik utersaarput, kisianni aamma tamanna suliarinissaanut sakkussaqalerninnik kinguneqarpoq. Uanni suli pitsanngoriaatissaqartoq takusinnaavara.

Eqqaamasaa siulleq

Kennethip mikisunnguunerminiilli kingunerlutsitsinini suliarilersimavaa.

Paarsisorisaata taanna atornerlussimavaa. Piffissami tassani qanorpiaq utoqqaassuseqarnerluni ilisimanngilaa, kisianni ataatsimik aamma ukioq ataaseq affarlu utoqqaassuseqarsimanissani eqqoriarpaa. Taanna eqqaamasami siullersarigaat oqaluttuarpoq.

- Sinittarfimmukaappaanga niumilu akornginut aalajangerlunga atornerluppaanga. Qiasuarpunga anersaartorsinnaajunnaarlunga, aalajangerteqqanera pissutaalluni. Naluara qanoq sivisutiginersoq. Anigattalu majuartarfik eqqaamasanni silittoq takuara, naak piviusumik amikkaluartoq. Inimukarpugut, tassanngaanniillu eqqaamasaqarpallaanngilanga.

Meeraq kierliortoq

Kennethip eqqaamasaasa tullii ukiut arlallit qaangiummata pipput.

- Taamatut kingunerlutsitsineq inummut qanoq sunniuteqarsinnaanersoq eqqarsaatigalugu tupinnarpoq. Misigissuseq taamaattoq taama ersaritsigisumik eqqaamaneqarsinnaasoq.

Anniarneq annertooq Kennethip meeraanini inuusuttuuninilu tamaat, allanut oqaluttuarnissami tungaanut nammatarisimavaa. Atualerami kisimiiluni biilinik pinnguartarpoq. Allanik oqaloqateqarpiarsinnaasimanngilaq, ikinnguteqaranilu.

Anaanaminut oqaluttuarisinnaasimanngikkaa

Atornerlugaasimanini oqaluttuareqqaaramiuk, ikinngutiminut oqaluttuaraa – taanna nammineerluni angummit taassuminnga atornerlunneqarnermi kingorna oqaluttuarmat. Ikinngutaata atornerluineq pillugu angajoqqaaminut oqaluttuarpoq, taakkulu Kennethip anaanaa attaveqarfigaat. Kisianni arlaannik pisoqarsimanersoq aperimmat ilumuunnginneraavoq.

- Oqaluttuarinissaa saperpara, ilaatigut taanna isertugaat ukiuni tallimani arfinilinniluuniit nammatarisimagakku ilerasunnera pissutigalugu.

Toqu ilukkut eqqissinissamik neriuuteqartitsisoq

Kenneth aatsaat 18-t aamma 19-t missaani ukioqalerami ilaquttaminut oqaluttuarpoq.

Isertukkap oqimaatsup imminut naleqartinngitsutut misigisimatippaa, ikinngutitaarniarlunilu allatut iliorluni. Angutaaniarlunilu mattusuutut pissusilersorluni. Pitsaanngitsunik aalajanertarluni.

- Unneqqariffiunngilaq. Aliasunneq aamma eqqarsaatit takutinneqarsinnaanngillat, tassami nassuiartariaqarmata – nassuiaanissarlu sapernarpoq.

20-t qaangerlugit ukioqalereernermini hashimik atornerluivoq. Atornerlugaasimasorpassuillu allat assigalugit Kenneth aamma imminut toqunnissamik eqqarsaateqarsimavoq. Ataasiarluni motorvejimut arpakkami aalaangajalluinnarpoq.

- Toqussagaluaruma ajunngilaq, ilunni eqqississagaluarpunga, taamanikkut taassuma eqqarsaatini oqaluttuarai.

Iluarsartuunneq

Kisianni piffissap ingerlanerani ajornartorsiutini saallugit suliarai. Taallianik allattarsimavoq, tassanilu eqqarsaatimi taarnersaat allattortarsimallugit.

Allanik oqaloqateqartarneq aamma iluarsartuunneranut ilaasimavoq.

- Aatsaat ukiuni tallimani kingullerni ilukkut eqqissiartulerpunga, paninnut uannullu pitsaasumik inuuneqarnissamut aqqummik sorlermik toqqaassanerlunga takusinnaaleriartorlugu, angut maanna 34-nik ukiulik oqarpoq.

Allat nammaqataasinnaapput

Metoo-mik isumaqatissarsiortoqarnerani aamma taamaaqataatalu Henrik Thomsenip atornerlugaasimanerminik oqaluttuarnerata Kenneth Bjørn Thomsen saqqummersippaa. Ammanermik pilersitseqataanermut ilaasinnaassalluni taassuma neriuutigaa, isertukkamillu oqimaatsumik kisimiillutik nammataqartorpassuarnut neriuuteqalersitsilluni.

- Tassami isertugaat nammataq namminermut artorsaaterujussuuvoq, avitseqatigiffigisanullu taama annertutigisumik artorsartitsissanersoq ernumassutigineqarsinnaasarpoq. Kisianni avitseqatigissutigigaanni kikkut tamarmik tigusillutik nammaqataajartulersartut takuneqartarpoq.

Powered by Labrador CMS